Kelesi jyly 3,9 mln qazaqstandyq deklaratsııa tapsyrýǵa mindetteledi
2024 jylǵy 1 qańtardan bastap zańdy tulǵalardyń basshylary men quryltaıshylary (qatysýshylary), jeke kásipkerler, sondaı-aq olardyń jubaılary syndy shamamen 3,9 mln adam deklaratsııa tapsyrýǵa mindetteledi. Bul týraly Qarjy vıtse-mınıstri Erjan Birjanov túsindirdi, dep habarlaıdy Kazinform.
Aıta keteıik, 2021 jyly 1 qańtardan Qazaqstanda kezeń-kezeńimen jalpyǵa birdeı deklaratsııa engizilgen edi. Bul jyly memlekettik qyzmetshiler jáne olarǵa teńestirilgen adamdar jáne olardyń jubaılary — shamamen 580 myń jeke tulǵa deklaratsııa tapsyrǵan edi.
«Bıyl ekinshi kezeńde — memlekettik organdar men kvazımemlekettik sektor qyzmetkerleri jáne olardyń jubaılary — shamamen 2,1 mln adam qamtyldy. Al úshinshi kezeńde — 2024 jylǵy 1 qańtardan bastap deklaratsııany zańdy tulǵalardyń basshylary men quryltaıshylary (qatysýshylary), jeke kásipkerler, sondaı-aq olardyń jubaılary tapsyrady. Bul shamamen 3,9 mln adamdy qamtıdy», — dedi Erjan Birjanov Senattyń qarjy jáne bıýdjet komıtetinde ótken otyrysta.
Tórtinshi kezeńde — 2025 jylǵy 1 qańtardan bastap azamattardyń qalǵan sanattary (mysaly, jeke qurylym qyzmetshileri, zeınetkerler, úı sharýasyndaǵy adamdar, stýdentter jáne basqalar) usynatyn bolady.
Munda 6,4 mln astam adamdy qamtý josparlanýda. Jalpy alǵanda, jalpy deklaratsııalaý júıesine 13 mln jýyq adam kirýi qajet.
«Jalpyǵa birdeı deklaratsııalaý júıesinde jeke tulǵalar barlyq sheteldik aktıvterin, jyljymaly jáne jyljymaıtyn múlkin kórsetetin „kiris“ deklaratsııasyn usynýy kerek. Máselen: sheteldegi jyljymaıtyn múlik jáne kólik; shetel bankindegi 7,3 myń AQSh dollarynan joǵary aqsha; sheteldik kompanııaǵa qatysý úlesi; baǵaly qaǵazdar, tsıfrlyq aktıvter (bıtkoınder jáne t. b.); úlestik qatysý sharty; altyn quımasy; zııatkerlik menshik jáne avtorlyq quqyq obektileri; 34,5 mln teńge sheginde qolma-qol aqsha; notarıaldy kýálandyrylǵan basqa tulǵalarmen qaryz sharty; quny 3,4 mıllıon teńgeden asatyn basqa múlikter», — dep túsindirdi Qarjy vıtse-mınıstri.
Deklaratsııany turǵylyqty jeri boıynsha 2024 jylǵy 15 qyrkúıekke deıin tapsyrý qajet. Ony «salyq tóleýshiniń kabıneti», elektrondy úkimet veb-portaly, «e-salyqAzamat», Halyk, Bank Tsentrkredıt mobıldi qosymshalary arqyly iske asyrýǵa bolady.
