Kelesi jylǵa deıin 12 óńirde 1 850 oryndyq ońaltý ortalyǵy ashylady
ASTANA. KAZINFORM – Qazaqstanda 2027 jylǵa deıin 12 óńirde jalpy syıymdylyǵy 1 850 tósek-oryndy quraıtyn jańa ońaltý ortalyqtary salynady, dep habarlaıdy Eńbek jáne halyqty áleýmettik qorǵaý mınıstrligi.
Joba Memleket basshysynyń tapsyrmasy aıasynda júzege asyrylyp jatyr. Onyń maqsaty – múgedektigi bar azamattarǵa kórsetiletin medıtsınalyq, áleýmettik jáne psıhologııalyq ońaltý qyzmetteriniń qoljetimdiligin arttyrý.
Qazirgi ýaqytta elimizdiń 12 óńirinde árqaısysy 150 orynǵa eseptelgen ońaltý ortalyqtarynyń qurylysy júrgizilýde. Jańa nysandar kezek kútý ýaqytyn qysqartyp, qoldaýǵa muqtaj azamattarǵa qolaıly jaǵdaı jasaýǵa múmkindik beredi.
«Sońǵy úsh jylda elimizde alty jańa ońaltý ortalyǵy paıdalanýǵa berildi. Onyń ishinde 2023 jyly – Semeı men Tarazda, 2024 jyly – Kentaý men Oralda, 2026 jyly – Atyraý men Astanada jańa ortalyqtar ashyldy», – dep málimdedi mınıstrlik.
Jańa ortalyqtardy salý jumystary kezeń-kezeńimen jalǵasady. 2027 jyldyń sońyna deıin Shymkent, Taldyqorǵan, Kókshetaý jáne Aqtóbe qalalarynda taǵy tórt nysandy paıdalanýǵa berý josparlanǵan.
Aıta keteıik, 2027 jylǵa deıin Qazaqstan óńirlerinde jańa travmatologııalyq ortalyqtar ashylatyny habarlandy.
