Kelesi jyldyń basy Qysqy Azıada oıyndarymen bastalady
ASTANA. KAZINFORM – Kelesi jyldyń sporttyq kúntizbesi iri keshendi jaryspen bastalady. 2025 jyly qysqy Azııa oıyndarynyń jalaýy jelbireıdi. Bul báseke Qytaıdyń Harbın qalasynda ótpek.
QR Ulttyq olımpıadalyq komıteti atap ótkendeı, Qysqy Azıada 2025 jyldyń 7-14 aqpany aralyǵynda ótedi.
Qysqy Azııa oıyndary alǵash ret 1986 jyly uıymdastyryldy. Sol kezde Japonııanyń Sapporo qalasy qurlyq elderiniń basyn qosqan bolatyn. Tuńǵysh ret ótken qysqy Azıadaǵa bar bolǵany jeti memlekettiń ókili qatysty. Alaıda, ýaqyt óte kele qurlyqtyń kishi Olımpıadasynda baq synaıtyn elder qatary kóbeıip, Azıada jarys kúntizbesindegi mańyzdy dodalardyń birine aınaldy.
Qysqy Azııa oıyndaryn eń kóp qabyldaǵan memleket – Japonııa. Kúnshyǵys elinde qurlyq básekesi tórt ret ótkizilgen. Al Qytaı iri sporttyq jarysty óz jerinde úshinshi ret qabyldamaq. Naqtylaı túser bolsaq, qysqy Azıada Harbın tórinde ekinshi ret ótkizilmek (bir ret oıyndar Chanchýnda uıymdastyrylǵan).
2011 jyly aq Azıadany Qazaqstannyń qabyldaǵany belgili. Jarystyń jartysy Astanada ótti. Atap aıtar bolsaq, mánerlep syrǵanaý, shaıbaly hokkeıden erler dodasy, konkımen júgirý jáne short-trek elorda tórinde uıymdastyryldy. Qalǵan sport túrlerindegi jeńimpazdar Almaty tórinde anyqtaldy.
Sońǵy Azııa oıyndary 2017 jyly Japonııanyń Sapporo qalasynda ótti. Al Harbın araǵa 29 jyl salyp, qysqy Azıadany qaıtadan qabyldamaq. Aıta ketelik, qytaılyq qalada Azıada sonaý 1996 jyly ótkizildi. Qazirgi tańda aldaǵy jarystyń basty atrıbýttary anyqtaldy.
Boıtumar «Jaryp ótý» degen ataýdy alǵan. Boıtumardyń eskızi short-trekte synǵa túsetin sportshynyń qımyldary arqyly jasaldy. Sondaı-aq, Harbındegi qalalyq gúl – sıren men oralǵan lentanyń beınesi de bar. Azııa oıyndary ataýynyń qysqarǵan nusqasy men Azııa Olımpıada Keńesiniń sımvoly da boıtumar elementine aınalǵan.
2025 jylǵy Azıadanyń boıtumarlary – sibirlik jolbarystar Bınbın men Nını. Urany: «Azııadaǵy qysqy arman men mahabbat». Azıadanyń saltanatty bóligi men jarystar jeti sport nysanynda ótedi. Olardyń qatarynda Harbın hokkeı arenasy, Halyqaralyq Harbın kongress-kórme jáne sport ortalyǵy, Harbındegi Pınfan aýdanynyń hokkeı arenasy, Harbın sporttyq ýnıversıtetiniń stýdenttik muzaıdyny, Heılýntszıan jattyǵý ortalyǵynyń muzdaǵy jarystarǵa arnalǵan kópfýnktsıonaldy zaly, Heılýntszıan oqý ortalyǵynyń muzdaǵy jarystarǵa arnalǵan zaly, ıAbýlı taý-shańǵy kýrorty.
Búginde sporttyq nysandar sońǵy daıyndyqty ótkerip jatyr. Bıylǵy shildede Azıadanyń bastalýyna 200 kún qalǵanyna oraı saltanatty merekelik shara uıymdastyryldy. Jalpy alǵanda, Harbınde 131 buqaralyq mádenı jáne kórkemdik is-shara ótip, 110 000 adam qatysqan.
Azııa oıyndarynda 11 sport túrinen júlde taratylady.
Sportshylar short-trek, konkımen júgirý, mánerlep syrǵanaý, shaıbaly hokkeı, kerlıng, taý shańǵysy, snoýbordıng, frıstaıl, shańǵymen jarysý, bıatlon jáne shańǵy alpınızminen synǵa túsedi.