Kelesi jyldyń 1 qańtarynan bastap sý salasy qyzmetkerleriniń jalaqysy 25% artady

Kelesi jyldyń 1 qańtarynan bastap sý salasy qyzmetkerleriniń eńbekaqysy orta eseppen 25%-ǵa ulǵaıady. Sý resýrstary jáne ırrıgatsııa mınıstrligi tıisti sharalardy ázirlep jatyr, dep habarlaıdy Kazinform. 

Budan bólek, Qazaqstannyń ár óńirinde sý resýrstaryn bólý jáne ony paıdalanýdy baqylaý máselelerimen aınalysatyn bólimder paıda bolady.

«Sý salasynda qyzmet etýdiń tartymdylyǵyn arttyrý qajet, eńbekaqyny kóterý – osy baǵyttaǵy mańyzdy qadamdardyń biri. Árıne, jumys istep júrgen kadrlardy salada ustap qalyp qana qoımaı, ýaqyt talabyna saı mamandardyń jańa tolqynyn daıyndaý da mańyzdy. Mınıstrlik tıisti usynys engizý boıynsha jumys istep jatyr», – deıdi QR Sý resýrstary jáne ırrıgatsııa mınıstri Nurjan Nurjigitov.