Kelesi jyldan bastap Ulttyq taýarlar katalogyn qoldaný mindetti bolady
ASTANA. KAZINFORM — Bıyl zań normalary qabyldanyp, klassıfıkatordy júrgizý tártibi belgilendi. Qazir katalog pılottyq rejımde jumys istep tur. Bul týraly OKQ alańynda QR saýda jáne ıntegratsııa vıtse-mınıstri Áset Núsipov habarlady.
— Jobaǵa Anvar, Small, Magnum sııaqty iri saýda dúkenderi qosyldy. Júıege 100 myńnan astam taýar ataýy qosymsha engizildi. Endi chektegi barlyq taýardyń NTIN arnaıy kody kórsetiledi. NTIN kody halyqaralyq GTIN (13 tańbaly taýar kody) kodyna uqsas, — dedi spıker baspasóz konferentsııasy barysynda.
Onyń aıtýynsha, taýarǵa berilgen kod arqyly onyń barlyq tsıklin — zaýyttan shyqqanyn, qaıda jiberilgenin kórýge bolady. Bul kóleńkeli saýdany, sapasyz ónim shyǵarýdy boldyrmaýǵa jáne ádil báseke ornatýǵa múmkindik beredi. Ulttyq taýarlar katalogyna taýar aınalymyna qatysýshylar qosyla alady. Joba aıasynda jappaı qosylýǵa arnalǵan oqý materıaldary, nusqaýlar men ınterfeıster daıyndalady.
Aıta ketelik 9 qazaqstandyq kásiporyn Qytaıdyń tamaq ónimderine jatpaıtyn taýarlar tizilimine endi.