Kelesi jyldan bastap UBT jańa formatta ótkizile bastaıdy

ASTANA. KAZINFORM – Qazaqstanda Ulttyq biryńǵaı testileýdi kezeń-kezeńimen jańǵyrtý jumystary bastaldy. Ǵylym jáne joǵary bilim mınıstrligi UBT formaty men mazmunyn 2029 jylǵa deıin transformatsııalaýdy josparlap otyr.

Dese de bul ózgerister barlyq talapkerge birden engizilmeıdi. Bul týraly QR Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti tóraǵasynyń orynbasary Janna Esınbaeva málimdedi.

Onyń aıtýynsha, 2026 jyly mektep bitirýshi túlekter úshin UBT formaty burynǵy kúıinde qalady.

– Bıyl mektep túlekteri úshin eshqandaı ózgeris bolmaıdy. UBT burynǵydaı qalypty rejımde ótkiziledi. Ózderińiz biletindeı, qańtar aıyndaǵy UBT bastalyp ketti. Oǵan 180 myńnan astam túlek tirkelgen. Al jazǵy kezeńde testileýge shamamen 220 myń oqýshy qatysady dep boljap otyrmyz, – deıdi ol.

Elimizde UBT 20 jyldan astam ýaqyt boıy ótkizilip keledi. Spıker bul reformanyń negizgi maqsatyn túsindirdi.

– Bul – synnan ótken test. Degenmen, ýaqyt talabyna saı onyń mazmunyn jańartý qajettiligi týyndap otyr. Ásirese test tapsyrmalarynyń mazmunyna ózgeris engizý mańyzdy, – dedi Janna Esınbaeva.

Reformanyń negizgi baǵyty – test mazmunyn jańǵyrtý. Aldaǵy ýaqytta UBT tek pándik bilimdi ǵana emes, fýnktsıonaldyq saýattylyqty, analıtıkalyq jáne synı oılaý qabiletin baǵalaıtyn jańa formattaǵy tapsyrmalardy qamtymaq.

– Jańa formattaǵy tapsyrmalar bilim alýshylardyń fýnktsıonaldyq saýattylyǵyn, oılaý daǵdylaryn, sonyń ishinde analıtıkalyq oılaý qabiletin anyqtaýǵa baǵyttalady, – dep túsindirdi ol.

Osy maqsatta mınıstrlik testologııa salasyndaǵy halyqaralyq sarapshylardy, onyń ishinde standarttalǵan emtıhandardy ázirleýde mol tájirıbesi bar ETS (Educational Testing Service) kompanııasyn tartqan. Komıtet ókili UBT-nyń halyqaralyq deńgeıde moıyndalatyn standarttalǵan testke aınalýyn maqsat etip otyrǵandaryn aıtady. Demek, bolashaqta jańartylǵan UBT nátıjeleri tek Qazaqstanda ǵana emes, shetelde de tanylýy múmkin.

Sonymen qatar reforma aıasynda ashyq formattaǵy tapsyrmalardy engizý múmkindigi de qarastyrylyp jatyr. Bul jaǵdaıda túlekter jaýapty daıyn nusqalardan tańdamaı, ózderi tujyrymdap jazady. Tóraǵa orynbasary mundaı ózgeristerdiń barlyq pánge birdeı engizilmeıtinin jáne kezeń-kezeńimen júzege asatynyn atap ótti.

– Test tapsyrmalarynyń formaty birden emes, birtindep ózgeredi. Bul mektep túlekterine eshqandaı qosymsha salmaq túsirmeýi tıis, – dedi ol.

Jańartylǵan UBT formatyna tolyq kóshý 2029 jylǵa josparlanǵan.

– Biz UBT-ny kezeń-kezeńimen jańartamyz. Áńgime eń aldymen test tapsyrmalarynyń mazmuny týraly bolyp otyr. Pılottyq jobalar júrgiziledi, qoǵammen jáne sarapshylarmen keń talqylaý bolady, – dep qorytyndylady spıker.

Mınıstrlik mamany UBT-dan bas tartý josparlanbaǵanyn atap ótti. Test burynǵydaı bilim berý granttaryn taǵaıyndaýdyń negizgi quraly bolyp qala beredi. Alaıda onyń mazmuny jańartylǵan mektep baǵdarlamalaryna jáne halyqaralyq standarttarǵa sáıkestendiriledi.

Eske sala keteıik, qańtar aıynda ótetin Ulttyq biryńǵaı testileý 10 qańtar kúni bastalǵan. Ol 10 aqpanǵa deıin jalǵasady.