Kelesi jyldan bastap taksı qyzmeti ózgeredi
ASTANA. KAZINFORM – QR Іshki ister mınıstriniń orynbasary Igor Lepeha rýli oń jaqtaǵy taksı kólikterine qatysty shekteý engiziletinin aıtty.
«Kólik mınıstriniń tıisti buıryǵy bar, onyń aıasynda rýli oń jaqtaǵy kólikterge jappaı jolaýshy tasymalymen aınalysýǵa tyıym salý máselesi qamtylǵan. Sonymen qatar tasymaldaý erejesin buzǵany úshin ákimshilik jaýapkershilik qarastyrylǵan. Degenmen, jeke tasymaldaýshylar bul talaptardy oryndamaı jatyr. Máselen, polıtsııa toqtatqan kezde, jolaýshylar osy kóliktegi barlyq adam týystary ekenin jáne toıǵa bara jatqanyn, kólik júrgizýshisiniń taksı qyzmetine qatysy joq ekenin aıtyp, shyndyqtan jaltarady. Bul turǵyda polıtsııa qyzmetkerleri kólik ıesi taksıde júrgenin bile tura, eshteńe isteı almaıdy», - dedi I. Lepeha Parlament Májilisinde tilshiler suraǵyna jaýap bere otyryp.
Onyń aıtýynsha, Іshki ister mınıstrligi Kólik mınıstrligimen, InDriver jáne ıAndeks agregatorlarmen tıisti memorandýmǵa qol qoıǵan.
«Olar oń rýldi jáne eki esikti kólikterdi taksı júıesinde tirkeýden bas tartady. Bul memorandýmdaǵy talaptar 2025 jyldyń 1 qańtarynan kúshine enedi», - dedi mınıstrdiń orynbasary.
Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine jolaýshylardy avtomobılmen tasymaldaý salasyndaǵy keıbir memlekettik fýnktsııalardy mindetti múshelikke (qatysýǵa) negizdelgen ózin-ózi retteýge berý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
