Kelesi jyldan bastap QHR-men sheteldik ruqsat blankilerin almasý tsıfrlyq formatta júredi

ASTANA. KAZINFORM — Kelesi jyldan bastap Qytaı Halyq Respýblıkasymen sheteldik ruqsat blankilerin almasý tsıfrlyq formatta júrgiziledi. 

Qujatqa eki eldiń beıindi mınıstrlikteri qol qoıdy.

Atalǵan jumystar blankilerdiń jalpy sanynan 60%-yn tsıfrlyq formatqa aýystyrýǵa múmkindik beredi. Bul týraly Kólik mınıstri Marat Qarabaev Almaty qalasynyń turǵyndarymen kezdesýde aıtty.

«Jalpy, qazaqstandyq tasymaldaýshylardyń halyqaralyq avtotasymaldarǵa qatysý kórsetkishi 31%-dan (2021) 52%-ǵa (2023) deıin ósti», — dedi mınıstr.

Esterińizge sala keteıik, búgingi tańda Qazaqstan álemniń 42 elimen sheteldik ruqsattarmen almasýdy júzege asyrýda. Aǵymdaǵy jyly rekordtyq aıyrbas jasaldy — 364 705 ShRB, onyń ishinde — 190 000 Qytaı blankileri.

Almaty qalasynyń turǵyndarymen kezdesýden keıin mınıstr jeke qabyldaý ótkizip, azamattardyń suraqtaryna jaýap berdi. Elimizdiń kólik salasyn odan ári damytýǵa qatysty usynystaryn tyńdady.