Kelesi jyldan bastap kásipkerlerdiń shottaryn avtomatty buǵattaý alynyp tastalady

ASTANA. KAZINFORM – Qarjy mınıstri Mádı Takıev jańa Salyq kodeksindegi basty jańalyqtardyń biri retinde kásipkerlerdiń banktik shottaryn avtomatty túrde buǵattaý tájirıbesinen bas tartýdy atady. 

Mınıstrdiń aıtýynsha, endi avtomatty buǵattaýdyń ornyna aldyn ala kameraldyq tekserý formaty engiziledi. Bul kásipkerlerge sharýashylyq qyzmetine nuqsan keltirmesten anyqtalǵan kemshilikterdi ýaqtyly túzetýge múmkindik beredi.

«Qarastyrylǵan ózgerister kásipkerlerdiń jumysyn edáýir jeńildetedi. Salyq eseptiligin azaıtý jáne salyqty azaıtý bızneske qaǵazbastylyqqa emes, damýǵa nazar aýdarýǵa múmkindik beredi. Shottardy avtomatty túrde buǵattaýdan bas tartý – ádil jáne ashyq qarym-qatynasqa qaraı jasalǵan mańyzdy qadam. Memleket kompanııalardyń jumysyn toqtatýdyń ornyna máseleni sheshýge kómektesedi. Mundaı sharalar memleket pen kásipker arasyndaǵy dıalogty nyǵaıtyp, qolaıly ınvestıtsııalyq ahýal týǵyzady», – dedi Mádı Takıev.

Onyń sózinshe, salyqtyq ákimshilendirýdi tsıfrlandyrýǵa erekshe nazar aýdarylyp otyr. Reforma sheńberinde salyq tóleýshilermen ózara is-qımyldyń servıstik modeline kóshý kózdelgen.

Jańa kodeks azamattarǵa da birqatar jeńildikter usynady. Máselen, zeınetaqy tólemderi jeke tabys salyǵynan bosatylady, 10 jyldan asqan avtokólikke salynatyn salyq tómendetiledi. Múgedektigi bar adamdar úshin salyq shegerimderi keńeıtiledi, áleýmettik mańyzy bar medıtsınalyq qyzmetke qosylǵan qun salyǵy boıynsha jeńildik qarastyrylǵan.

Al bıznes úshin arnaıy salyq rejımi ońtaılandyryldy: endi tek úsh túri qalady – ózin-ózi jumyspen qamtyǵandarǵa, jeńildetilgen deklaratsııa negizinde jumys isteıtin shaǵyn bızneske jáne fermerlerge arnalǵan rejım.

Sonymen qatar, QQS boıynsha mindetti tirkeý shegi 70 mln teńgeden 40 mln teńgege deıin tómendeıdi.

Aıta keteıik, Serik Jumanǵarın Salyq kodeksi boıynsha medıa men áleýmettik jelilerde shyqqan tizimniń jalǵan ekenin aıtty.