Kelesi jyldan bastap Gonkong pen Almatynyń arasynda tikeleı áýe reısi qatynaıdy
ASTANA. KAZINFORM — Búgin Qazaqstan Respýblıkasynyń Premer-Mınıstri Oljas Bektenov pen Qytaı Halyq Respýblıkasy Gonkong Arnaıy ákimshilik aýdanynyń Basshysy Djon Lımen kezdesýi barysynda Gonkong – Almaty – Gonkong baǵyty boıynsha tikeleı áýe qatynasyn ashý jospary týraly aıtyldy. Bul týraly Kólik mınıstrligi málim etti.
2027 jyldyń 1 toqsanynan bastap Cathay Pacific áýe kompanııasy tikeleı reısterdi ashýdy josparlap otyr. Kezdesýge Cathay Pacific kompanııasynyń klıenttermen jumys jáne kommertsııalyq máseleler jónindegi dırektory Lavınııa Laý da qatysty.
— Áýe tasymaldaýshysynyń josparyna sáıkes, ushýlar Airbus A330-300 keń fıýzelıajdy áýe kemelerimen aptasyna úsh ret jıilikpen júzege asyrylady. Jańa baǵyt Gonkong pen Qazaqstan arasyndaǵy jalǵyz tikeleı áýe qatynasy bolmaq, — dep habarlady vedomstvodan.
Cathay Pacific — Gonkongtyń flagmandyq áýe kompanııasy. Ol Gonkong halyqaralyq áýejaıynda ornalasqan jáne álem boıynsha 200-den astam baǵytqa turaqty jolaýshylar men júk tasymalyn júzege asyrady.
— Reısterdiń ashylýy Qazaqstan, Gonkong jáne Azııa-Tynyq muhıty aımaǵy arasyndaǵy saýda-ekonomıkalyq, ınvestıtsııalyq jáne týrıstik baılanystardy odan ári nyǵaıtýǵa, sondaı-aq eldiń halyqaralyq marshrýttyq jelisin keńeıtýge yqpal etetin bolady, — delingen habarlamada.
Eske sala keteıik, buǵan deıin Astanadan Úrimjige qatynaıtyn qosymsha áýe reısteriniń sany artqan bolatyn.
