Kelesi jyldan bastap arnaıy taǵylymdama baǵdarlamasy ashylady — Saıasat Nurbek

ASTANA. KAZINFORM — Ǵylym jáne joǵary bilim mınıstri Saıasat Nurbek Memleket basshysynyń Educational Testing Service (ETS) kompanııasy jáne Smıtson ınstıtýty jetekshilerimen kezdesýleri jóninde pikir bildirdi.

Bul týraly Aqordanyń baspasóz qyzmeti málim etti.

Mınıstrdiń sózinshe, «Bolashaq» baǵdarlamasynyń aıasynda endi ataqty Smıtson ınstıtýty negizinde antropologııa, tarıh syndy salalarda taǵylymdamalar ótkiziledi.

— Búgin Prezıdentimizdiń resmı saparynyń aıasynda AQSh-tyń eki úlken ınstıtýtymen kezdesý ótkizildi. Birinshisi ataqty — Smıtson ınstıtýty boldy. «Bolashaq» baǵdarlamasynyń aıasynda endi ataqty Smıtson ınstıtýty negizinde antropologııa, tarıh, mádenıettaný, dintaný jáne taǵy basqa da salalarda taǵylymdamalar uıymdastyrylady. Kelesi jyldan bastap arnaıy taǵylymdama baǵdarlamasy ashylady. Ol ǵylymı qyzmetkerlerimizge, mádenıettanýshylarymyzǵa, antropolog-tarıhshylarymyzǵa eń tereń tarıhı zertteýlerdi osy ınstıtýttyń negizinde ótkizýge múmkindik beredi, — dedi Saıasat Nurbek.

Ǵylym jáne joǵary bilim mınıstrliginiń basshysy Educational Testing Service (ETS) kompanııasynyń kómegimen Ulttyq Biryńǵaı testileýdiń sapasyn ózgertý, mazmunyn tolyqqandy qarastyrý sııaqty jumystar júrgiziletinin aıtty.

— Ekinshi úlken kezdesý ataqty ETS — 80 jyldyq tarıhy bar eń iri test jasaıtyn jáne testologııany zertteıtin ǵylymı ortalyqpen ótkizildi. Qazirgi tańda bizdiń Ulttyq Biryńǵaı testileýdiń sapasyn kúrt ózgertý, mazmunyn tolyqqandy qarastyrý sııaqty jumystar osy eń iri, eń ataqty testologııa ǵylymı ortalyǵymen atqarylatyn bolady. Kelesi aıda zertteýshilerdiń úlken delegatsııasy Qazaqstanǵa keledi. Biz osy jumysty júıeli túrde atqaramyz, — dedi ol.

Budan buryn habarlanǵandaı, Qazaqstan ETS kompanııasynyń bilimdi testileý tájirıbesin zerdeleýge múddeli.

Sonymen qatar Prezıdent AQSh-ta qazaq mádenıetin dáriptep júrgen Smıtson ınstıtýtyna alǵys aıtty.