Keler jyldan bastap «Kóktóbe» munarasy túnde jarqyrap turady
Almatyda kópke tanymal oryndar men saıabaqtar abattandyrylatyn bolady. Bul týraly óńirlik kommýnıkatsııalar qyzmetiniń brıfınginde Medeý aýdanynyń ákimi Erkebulan Orazalın aıtty, dep habarlaıdy Kazinform.
Spıkerdiń sózinshe, bıyl shilde aıynda jeke qarajat esebinen sáýlet eskertkishi QR Prezıdenti janyndaǵy Ulttyq ǵylym akademııasy ǵımaratyn kúrdeli jóndeý jumystary bastalǵan. Jobada sondaı-aq Ǵylym akademııasyna irgeles aýmaqtaǵy Shoqan Ýálıhanov atyndaǵy alań men Shevchenko kóshesi jaǵynan irgeles jatqan skverdi abattandyrý kózdelgen. Qazir jumystar 90%-ǵa aıaqtaldy.
«Osyǵan uqsas jumystar Ǵylym akademııasy ǵımaratyna irgeles Pýshkın kóshesine jaqyn alańda da júrgizilýde. Bul joba «Halyq qatysatyn bıýdjet» baǵdarlamasy aıasynda júzege asýda. Úsh alańdaǵy jumystar jyl sońyna deıin aıaqtalady. Sondaı-aq, qala nyshandarynyń biri «Kóktóbe» telemunarasyn sáýlettik-kórkemdik jaryqtandyrý jumystary josparlanǵan. Qurylys-montajdaý jumystary 2024 jyldyń qańtar aıynda bastalyp, mamyr aıynda aıaqtaý josparlanýda», - dedi spıker.
Qoǵamdyq keńistikterdi damytý aıasynda «Samal-1» shaǵyn aýdanynda ornalasqan «Jýrnalıster» saıabaǵyn rekonstrktsııalaý jumystary jyl sońyna deıin júrgiziledi. «Alataý» shaǵyn aýdany turǵyndarynyń ótinishimen bıyl Ibragımov kóshesinde skeıt-parktiń qurylysy bastaldy. Jumystar jyl sońyna deıin aıaqtalady.
«Aıaqtalý satysynda turǵan kelesi joba ol – Dostyq dańǵylynan «Esentaı» ózenine deıingi Ospanov kóshesindegi jaıaý júrginshiler aımaǵy. Joba aıasynda uzyndyǵy 500 metrge jýyq trotýar joly keńeıtildi. Jaıaý júrginshiler aımaǵynyń basty ereksheligi 80 sýretshiniń kórkem kompozıtsııalarymen bezendirilgen graffıtı qabyrǵasy boldy», - dedi Erkebulan Orazalın.
Ol bıyl qyrkúıek aıynyń basynda jeke qarajat esebinen «Kók - Tóbe» saıabaǵyna deıin uzyndyǵy 1,2 shaqyrym jaıaý júrginshiler jolyn salý jumystary bastalǵanyn aıtty. Búgingi kúni jol salý jáne asfalttaý boıynsha negizgi jumystar jasaldy. Jaryqtandyrý men basqa da jumystar 2024 jyldyń kókteminde aıaqtalady.
Bıyl sondaı-aq «Kók bazardy» jańǵyrtý jumystary bastaldy. Jelilerdi qaıta jańartý júrgizilýde, ortalyq kireberistiń aldynda beton jabyndysyn jańartý, tirek konstrýktsııalaryn kúsheıtý, aýmaqty abattandyrý josparlanýda. Jumystardy 2025 jyldyń sońyna deıin aıaqtaý josparlanyp otyr.
Eske salsaq, Almaty ákimi Erbolat Dosaev buǵan deıin «Kók bazardyń» jańartylatyny týraly aıtqan bolatyn.
