Kelesi jyldan bastap Almatyda turǵyn úıdi basqarý tarıfi ózgeredi
ALMATY. KAZINFORM – Almatyda turǵyn úıdi kútip-ustaýǵa arnalǵan eń tómengi tarıfti bekitý josparda.
«2025 jylǵa arnalǵan kondomınıým obektisin basqarýǵa jáne kondomınıým obektisiniń ortaq múlkin ustaýǵa jumsalatyn shyǵystardyń eń tómengi mólsherin bekitý týraly» máslıhattyń sheshimi ázirlendi. Almatyda turǵyn úıdi basqarý jáne kútip-ustaý boıynsha shyǵystardyń eń tómengi mólsheri 1 sharshy metrge 40 teńge mólsherinde bekitilsin», — delingen qujatta.
Turǵyn úıdi basqarý jáne kútip-ustaý shyǵystaryna mindetti jalaqy jarnalary, banktik qyzmetter, deratızatsııa jáne dezınfektsııalaý jumystary jáne ortaq múlikke qyzmet kórsetý kiredi.
«Buryn eń tómengi tarıf 1 sharshy metr úshin 25 teńge boldy. Sońǵy 14 jylda jylyna orta eseppen 7 paıyz ınflıatsııany eskere otyryp, jumys toby tarıfti qaıta eseptedi. 2023 jyldan bastap aýlalardy kútip ustaý jergilikti bıýdjetten qarjylandyrylatynyn, al kúrdeli jóndeý jumystary jeke jınaq shotynan júrgiziletinin eskerý qajet», — delingen negizdemede.
Almatyda shamamen 9 myń kópqabatty turǵyn úı bar, olardyń 5500-den astamynda turǵyn úıdi kútip-ustaýǵa arnalǵan tarıf 1 m² úshin 40 teńgeden tómen.
Jańa tarıfti bekitý Almatynyń turǵyn úı qoryn basqarý jáne kútip-ustaý sapasyn jaqsartýǵa jáne qala turǵyndary úshin qolaıly jaǵdaı jasaýǵa mańyzdy qadam bolmaq.
Qujat 5 jeltoqsanǵa deıin qoǵamdyq talqylaý úshin «Ashyq NQA» saıtynda ornalastyryldy.
Osyǵan deıin Almaty qalasynyń PIK qaýymdastyǵy kóppáterli turǵyn úılerdi basqarý jáne kútip ustaýdyń mınımaldy tarıfin qaıta qaraýdy usynǵan bolatyn.