Keles turǵyndary jalǵyzbasty ákege baspana alyp berdi

KELES. QazAqparat - Túrkistan oblysy, Keles aýdanynyń turǵyndary jalǵyzbasty ákege asarlatyp úı alyp berdi. Bozaı aýylynyń turǵyndary muqtaj januıaǵa 20-ǵa jýyq qoı berip, aýyl ákimdigi otaǵasyn jumysqa ornalastyrǵan, dep habarlaıdy QazAqparat tilshisi.

Bozaı aýyldyq okrýginiń turǵyny Andreı Grıbanov - 3 balany tárbıelep otyrǵan jalǵyzbasty áke. Jubaıy erte qaıtys bolyp, búginde 2 qyzy men 1 ulymen birge turady.

2015 jyly jumys babymen aýyldaǵy turǵyn úıin satýǵa májbúr bolyp, Saryaǵash qalasyna qonys aýdarǵan. Keıinnen densaýlyǵy syr berip, aýylǵa qaıtýǵa týra kelgen.

Aýyl turǵyndary jaldamaly páter surap kelgen azamatqa baspana syılap, onyń ishin jıhazdarmen toltyryp berdi. Atap aıtqanda, turmystyq tehnıka men jıhaz, ydys-aıaq pen qajetti kıim-keshek, azyq-túlik taýarlarymen qamtamasyz etken.

Aýyldastary aldaǵy ýaqytta baspanany tolyq jóndeýden ótkizbekshi.

Baspanaly bolǵan Andreı Petrovıch qamqor jandarǵa rızashylyǵyn bildirip, sheksiz alǵysyn aıtty.