Kelesi saılaýǵa deıin partııalar qyzý jumys isteıdi – sarapshy
ASTANA. KAZINFORM – QR Prezıdentiniń janyndaǵy Qazaqstan strategııalyq zertteýler ınstıtýty dırektorynyń orynbasary Alýa Joldybalına Quryltaı saılaýy nátıjesi saıası ınstıtýttardyń aldaǵy qyzmetine qalaı áser etetinin málimdedi.
Aldymen ol Halyq keńesiniń jańa ınstıtýt ekenin jáne onyń aldynda úlken mindetter turǵanyn atap ótti.
– Halyq keńesi konsýltatıvtik organ bolǵanmen, aımaqtyń ókilettigin qamtamasyz etedi. Oǵan túrli óńirlerden enetin azamattardyń keńes berý quzyreti bolady. Sonymen qatar Halyq keńesi burynǵy Qazaqstan halqy assambleıasy, Ulttyq quryltaı tárizdi ınstıtýttardyń qyzmetin biriktiredi, – Alýa Joldybalına Qazaqstandyq qoǵamdyq damý ınstıtýty uıymdastyrǵan sarapshylyq klýbynyń otyrysynan keıin jýrnalısterge suhbat bere otyryp.
Sonymen birge, onyń sózinshe, saılaý nátıjesinde saıası partııalardyń jumysy artady.
– Mysaly, Qazaqstan halyq partııasy bes paıyzdyq mejeden aspaı qaldy. Bul, árıne, qoǵamdaǵy ıdeologııalyq ustanymdardyń ózgerisin kórsetedi, ıaǵnı solshyl ıdeologııa báseńdegen. Degenmen bul partııa úshin bári bitti degen sóz emes. Ary qaraı jumys isteýi kerek. Demek, keshe saılaý aıaqtalsa, endi kelesi saılaýǵa deıin partııalar taǵy da qyzý jumys atqarady. Endi olar ótken saılaýdan ózderi qorytyndy shyǵaryp, kelesi elektoraldyq kampanııaǵa qalaı daıyndalatynyn oılastyrýy tıis, – dedi Qazaqstan strategııalyq zertteýler ınstıtýty dırektorynyń orynbasary.
Odan bólek, maman halyqaralyq qaýymdastyqtyń Qazaqstandaǵy saıası úderisterdi baqylap otyrýǵa degen yntasy artqanyn málimdedi.
– 2023 jylǵy saılaýmen salystyrǵanda, bıylǵy saıası naýqanǵa halyqtyń qatysý deńgeıi joǵary. Syrttan da qyzyǵýshylyq joǵary. Rekordtyq kórsetkish tirkeldi. 14 halyqaralyq uıymnan, 42 memleketten 777 halyqaralyq baıqaýshy keldi. Bul Qazaqstandaǵy saıası reformalarǵa, saıası ınstıtýttardyń ózgerýine shetelderden zor qyzyǵýshylyq bar ekenin bildiredi, – dedi ol.
Aıta keteıik, buǵan deıin sarapshy depýtattardyń saıası mádenıetin 4 ólshemshart boıynsha baǵalaýdy usynǵanyn jazǵanbyz.
