Kelesi Parlamentimiz Quryltaı sózimen atalsa, muny jaqsy yrymǵa balaýǵa bolady – Memleket basshysy

QYZYLORDA. KAZINFORM – Ult bolashaǵyn aıqyndaıtyn eń mańyzdy sharýalar endi bastaldy. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev málim etti.

- Ulttyq quryltaı el tarıhynda qalady. Biz az ǵana ýaqyt ishinde aýqymdy jumys atqardyq. Ádiletti, Qýatty, Qaýipsiz ári Taza Qazaqstannyń irgesin birge qaladyq. Sizder elimizdiń saıası-ekonomıkalyq, áleýmettik jáne rýhanı bolmysyn ózgertý jolynda zor eńbek ettińizder.

Memlekettigimizdi nyǵaıtýǵa eleýli úles qostyńyzdar. Aldaǵy ýaqytta da biz birge el ıgiligine qyzmet ete beremiz dep senemin. Bizdi áli de kóp jumys kútip tur. Ult bolashaǵyn aıqyndaıtyn eń mańyzdy sharýalar endi bastaldy. Sondyqtan qıyndyqtan jaltaryp nemese tabysqa toqmeıilsip otyrýǵa qaqymyz joq, ýaqytymyz da joq, - dedi Qasym-Jomart Toqaev. 

Osy oraıda Prezıdent birligimizdi bekemdep, bilek sybanyp, iske kirisýimiz kerek ekenin aıtty. 

- Kelesi Parlamentimiz halqymyzdyń ulttyq sanasynda ózindik orny bar uǵym, atyna zaty saı Quryltaı sózimen atalsa, muny jaqsy yrymǵa balaýǵa bolady dep senemin, - dedi Memleket basshysy.

Aıta keteıik, Prezıdent QHA men Ulttyq quryltaıdyń tarıhı mańyzdy mıssııalary sátti aıaqtalǵanyn aıtty.