Kelesi pandemııa qandaı bolady – ǵalym boljamy

Ómir týraly ǵylymdar salasyndaǵy serpilis úshin álemdik syılyqtyń laýreaty atanǵan Paskal Maıer Astanadaǵy Nobel festıvalinde kelesi pandemııanyń yqtımal kózderin boljady, dep habarlaıdy QazAqparat tilshisi.

Ǵalym dúnıejúzilik COVID-19 pandemııasy úlken qaıǵyly jaǵdaıǵa ákelip, birinshi jyly 3 mıllıon adamnyń ómiri qıylǵanyn aıtty.

«Maýsymdyq tumaý pandemııasy - bul jyl saıyn bolady jáne ólim-jitim kóp. Mysaly, Frantsııada biz jyl saıyn ólim-jitimniń artyp kele jatqanyn kóremiz. Esterińizde bolsa, COVID-19 maýsymdyq tumaý ma degen pikirtalas týyndaǵan edi. Mysaly, Ebola vırýsy da óte aýyr vırýstyq ınfektsııa. Ólim deńgeıi shamamen 50%, árbir ekinshi adam qaıtys bolady. Al COVID-19 sol ınfektsııalardyń júzdiń biri», - dedi Paskal Maıer Nobel fest sharasynda.

Ǵalymnyń aıtýynsha, pandemııamen kúres barysynda kóptegen elder tez áreket etý strategııalaryn ázirledi.

Sondaı-aq, Qazaqstannyń QazVac vaktsınasyn sátti ázirlep, onyń klınıkalyq synaqtaryn tez ótkenin atap ótti.

Odan bólek, ǵalym mıkroorganızmderdiń antıbıotıkterge tózimdiligin adamzat úshin taǵy bir qaýip dep atady.

«Bakterııalar dári-dármekterge tez tózimdi bolady. Osy sebepti 2050 jylǵa qaraı jyl saıyn 10 mıllıonǵa deıin kisi ólimi bolýy múmkin. Dúnıejúzilik densaýlyq saqtaý uıymy birqatar úlken qaýipti boljaıdy. Mysaly, Arktıkada tózimdilik genderi bar bakterııalar muz qabatynyń astynan tabyldy», - deıdi P. Maıer.

Spıkerdiń málimdeýinshe, álemge jańa dári-dármekter qajet, biraq ony kommertsııalyq turǵydan tıimdi etip eshkim jasaı almaıdy.

Aıta keteıik, Astanada dástúrli Nobel fest festıvali ótip jatyr.

Altynshy ret uıymdastyrylǵan sharaǵa arnaıy shaqyrylǵan Nobel syılyǵynyń laýreattary, ǵalymdar, bıznes ókilderi qatysýda.