Kelesi Rım Papasy kim bolýy múmkin

VATIKAN. KAZINFORM — 21 sáýir kúni qos ókpesi qabynýynyń saldarynan 88 jasynda Rım Papasy Frantsısk kóz jumdy. Katolık shirkeýiniń kelesi basshysy kim bola alady jáne ol qalaı saılanady? Bul týraly Kazinform agenttiginiń menshikti tilshisi arnaıy materıal daıyndady.

Basty úmitkerlerler kimder

Katolık shirkeýine jańa basshy bolýy múmkin birneshe úmitker bar:

• Petro Parolın (70 jasta, Italııa) — Vatıkannyń Memlekettik hatshysy, saıası ustanymy ortasha, Frantsısk Papanyń baǵytyn jalǵastyrýshy retinde qarastyrylady.

• Frıdolın Ambongo Besýngý (65 jasta, Kongo Demokratııalyq Respýblıkasy) — Afrıka men Madagaskar epıskoptyq konferentsııalary sımpozıýmynyń tóraǵasy, konservatıvti kózqarasymen tanymal.

• Vım Eık (71 jasta, Nıderland) — burynǵy dáriger, Papa Frantsısktiń birqatar reformalaryna qarsy shyqqan qatań konservator.

• Peter Erdo (72 jasta, Vengrııa) — konservatıvti ustanymdaǵy kardınal, ajyrasqandar men qaıta úılengenderdiń qaýymdastyqqa qatysýyna qarsy.

• Lýıs Antonıo Tagle (67 jasta, Fılıppın) — progressıvti kózqarasta, LGBT men ajyrasqan katolıkterdi shirkeýge tartýdy qoldaıdy.

• Reımond Berk (76 jasta, AQSh) — ýltrakonservator, Frantsısk Papanyń reformalaryn ashyq synǵa alǵan.

• Marıo Grek (67 jasta, Malta) — ortasha baǵyttaǵy kandıdat, shirkeý iliminde ınklıýzıvtilikke mán beredi.

• Matteo Marııa Dzýppı (69 jasta, Italııa) — Bolonıa arhıepıskopy, Frantsısk Papanyń Vatıkandaǵy negizgi odaqtastarynyń biri.

Aıta keteıik, Papa Frantsısk qazirgi daýys berýge quqyly kardınaldardyń basym bóligin ózi taǵaıyndaǵan. Bul onyń baǵytyn jalǵastyratyn izbasardyń tańdalýyna yqpal etýi múmkin.

Katolık shirkeýiniń basshysy qalaı saılanady?

Papany saılaý — ejelgi dástúrlerge saı ótetin kúrdeli úderis. Ol konklav dep atalady, bul «jabyq jınalys» degendi bildiredi. Kelesideı kezeńderden turady:

1. Papanyń qaıtys bolýy nemese taqtan bas tartýy

   Pontıfık qaıtys bolǵanda nemese otstavkaǵa ketkende (mysaly, 2013 jyly Benedıkt XVI), “Sede Vacante” — ıaǵnı «taqtyń bos qalýy» kezeńi bastalady.

2. Kardınaldardy jınaý

   Vatıkanǵa shamamen 200 kardınal shaqyrylady. Biraq daýys bere alatyndary — jasy 80-nen aspaǵandar (ádette shamamen 120 adam).

3. Sıkstın kapellasyndaǵy konklav

   Kardınaldar Sıkstın kapellasyna kirip, saılaýǵa qatysatyndaryna jáne qupııany saqtaıtyndaryna ant beredi. Kapellany eshkim tastap kete almaıdy, syrtpen baılanysqa túsýge tyıym salynady.

4. Daýys berý protsesi

   Ár kardınal úmitkerdiń atyn qaǵazǵa jazyp, daýys beredi. Úmitkerdiń saılanýy úshin 2/3 daýysty jınaýy kerek. Eger nátıje shyqpasa, bıýlletender arnaıy hımıkatpen órteledi — qara tútin — jańa papanyń áli saılanbaǵanyn bildiredi. Jańa Papa saılanǵanda tútin aq bolady.

5. Papa esimin tańdaý jáne alǵashqy sóz

   Saılanǵan kardınaldan: «Sen bul saılaýdy qabyldaısyń ba?» — dep suraıdy. Ol kelisse, Papalyq esim tańdaıdy (mysaly, Frantsısk, Benedıkt, Ioann, Pavel). Sodan keıin ol Áýlıe Petr soborynyń balkonyna shyǵyp, «Habemus Papam!» — «Bizde jańa Papa bar!» — degen jarııalaý jasalady. Jańa Papa halyqty alǵashqy ret jarylqap, óz qyzmetin bastaıdy.

Eske sala keteıik, 21 sáýir kúni Rım Papasy Frantsısk 89 jasqa qaraǵan shaǵynda kóz jumdy.

19 aqpan kúni Rım Papasy Frantsıskke eki jaqty pnevmonııa dıagnozy qoıyldy.

Vatıkan 24 aqpanda Rım Papasy Frantsısktiń jaǵdaıy aýyr ekenin jáne erte búırek jetispeýshiligi anyqtalǵanyn habarlady. 88 jastaǵy pontıfık basqa da asqynýlarǵa ulasqan pnevmonııamen kúresip jatqany aıtyldy.

Rım Papasy Frantsısktiń emdeýshi dárigerleri ony jeksenbide Gemelli aýrýhanasynan shyǵaratynyn habarlady.

Pasha meıramynda Rım Papasy kópshilik aldyna shyqty.

Memleket basshysy Rım Papasy Frantsısktiń qazasyna baılanysty kóńil aıtty.