Kelesi qysta Qazaqstanda elektr energııasy tapshy bolady

ASTANA. KAZINFORM – «KEGOC» AQ Basqarma tóraǵasy Nábı Aıtjanov 2024 jyldyń qazanynan 2025 jyldyń naýryzyna deıin elimizde elektr energııasy tapshylyǵy boljanyp otyrǵanyn aıtty.

«Aldaǵy kúzgi-qysqy kezeńge arnalǵan boljamdy balanstar 2024 jylǵy qazannan bastap, 2025 jylǵy naýryzǵa deıingi aralyqta elektr energııasy boıynsha da, qýat boıynsha da tapshylyq bolatynyn kórsetip otyr», - dedi Nábı Aıtjanov QR Energetıka mınıstrliginiń alqa otyrysynda. 

Onyń aıtýynsha, boljamdy eń joǵary elektr júktemesi (17,4 GVt) men stantsııalardyń 16,4 GVt generatsııalaýy kezinde tapshylyq shamamen 1,025 GVt quraıdy, ony negizinen Reseı Federatsııasynan ımporttaý nemese Qazaqstan tutynýshylaryn shekteý arqyly jabýǵa bolady.

«Aldaǵy kúz-qys kezeńinde elektr energııasyn tutynýdyń ósý dınamıkasyna sáıkes, ońtústik aımaqtyń eń kóp júktemesi 4500 MVt-tan asýy múmkin. Ońtústik óńir tutynýshylarynyń qajettilikterin tolyq qamtýdy qamtamasyz etý jáne shekteýlerdiń engizilýine jol bermeý úshin Jambyl GRES 5 bloktyq rejımde jumys isteýi qajet», - dedi ol. 

Jalpy, «KEGOC» AQ derekteri boıynsha 2024-2030 jyldarǵa arnalǵan elektr qýatynyń boljamdy teńgerimi tapshylyq bolatynyn kórsetedi, 2030 jylǵa qaraı bul jetispeýshilik 6,2 GVt-qa deıin jetedi.