Kelesi Qysqy Azııa oıyndary qaıda ótedi
ASTANA. KAZINFORM — Búgin Qytaıdyń Harbın qalasynda alaýy tutanǵan Qysqy Azııa oıyndary aıaqtalyp, kelesi kezekti Saryqurlyq dodasy ótetin el belgili boldy.
Naqtyraq aıtsaq, kelesi Qysqy Azııa oıyndary 2029 jyly Saýd Arabııasynda ótetin bolyp bekitildi.
Bul týraly búgin Harbın Qysqy Azııa oıyndarynyń jabylý saltanatynda belgili boldy. Atalǵan sharada Harbın qalasynyń meri Van Heshen men Azııa Olımpıada keńesi tóraǵasynyń birinshi orynbasary Fok Jentın týdy Saýd Arabııasynyń Ulttyq sport komıteti tóraǵasyna jáne Ulttyq sport komıtetiniń tóraǵasy Hanzada Feısalǵa tapsyrdy.
Osylaısha tuńǵysh ret Qysqy Azııa oıyndary Batys Azııada elinde ótpek.
Eske sala keteıik, Qazaqstan quramasy Harbın Qysqy Azııa oıyndarynda 4 altyn, 9 kúmis, 7 qola medal jeńip alyp, jalpy esep boıynsha tórtinshi orynǵa turaqtady.
Bul joly qytaılyq sportshylar óz elinde ótken oıyndardyń kóshin bastady. Jarys qojaıyndary 32 altyn, 27 kúmis, 26 qola medal jeńip aldy. Al 16 altyn, 15 kúmis, 14 qola ıelengen Ońtústik Koreıa sportshylary ekinshi orynǵa jaıǵassa, úzdik úshtikti Japonııa sportshylary qorytyndylady. Olardyń enshisinde 10 altyn, 12 kúmis, 15 qola medal bar.
Harbın qalasynda ótken IX Qysqy Azııa oıyndarynda úzdik nátıje kórsetken alǵashqy 5 el:
1. Qytaı — 85 (32-27-26);
2. Ońtústik Koreıa — 45 (16-15-14);
3. Japonııa — 37 (10-12-15);
4. Qazaqstan — 20 (4-9-7);
5. Fılıppın — 1 (1-0-0);
5. Ózbekstan — 1 (1-0-0);
Osyǵan deıin Qazaqstan erler hokkeı komandasy Qytaıdyq Harbın qalasynda ótip jatqan ІH qysqy Azııa oıyndarynda chempıon atanǵanyn jazdyq.