Kelesi kelgende taýly aımaqtardy aralaımyn: Túrkistanǵa Abý-Dabıden ushyp kelgen týrıst
TÚRKІSTAN. KAZINFORM – «ABU-DHABI — TURKISTAN» baǵytyndaǵy alǵashqy ushaq Túrkistan áýejaıyna qondy.
Búgin Túrkistan halyqaralyq áýejaıyna Abý-Dabıden «Wizz Air» áýekompanııasynyń Airbus 321 ushaǵy kelip qondy. Birikken Arab Ámirlikteriniń tanymal týrıstik qalasynan baǵyt alǵan ushaqta 100 jolaýshy, 7 ekıpaj múshesi boldy. Al, dál osy kúni rýhanı astana Túrkistannan Abý-Dabıge 200 adam attandy.
Túrkistan halyqaralyq áýejaıynyń basqarýshy dırektory Ilıas Nuǵmanovtyń aıtýynsha, 100 jolaýshynyń 40%-y sheteldikter, ıaǵnı týrıster.
«Bıletterdiń baǵasy óte qoljetimdi. Wizzair.com saıty men mobıldi qosymshasynda 19 myń teńgeden, ıaǵnı BAÁ-niń 159 dırhamynan bastalady. Qos qala arasynda saıahat jasaýdy josparlaǵandar úshin bıletterdi aldyn ala satyp alýdy usynamyz. Eger kórsetilgen saıtqa tirkelip, klýb múshesi atanǵan jaǵdaıda 10%-ǵa deıingi jeńildikterdi alýǵa múmkindik bar. Reıster aptanyń seısenbi, beısenbi jáne senbi kúnderi oryndalady», — dedi Ilıas Nuǵmanov.
Abý-Dabıden ushyp kelgen jolaýshylardyń arasynda Úndistan eliniń azamattary bar. Sonyń biri Ahmet Bashı óz áserimen bólisti.
«Men Dýbaıda turatyn úndistandyqpyn. Búkil álemdi saıahattap júrmin. Buǵan deıin Ózbekstan elinde boldym. Mádenıetterińiz uqsas eken. Qazaqstanǵa jubaıymmen birge 4 kúnge keldik. Qaı qalalarǵa baratynymyzdy áli sheshken joqpyz. Qonaq úıge ornalasqan soń oılanyp, erteń saıahattaýdy bastaımyz. Bul reıstiń ashylǵany — meniń taǵy da osynda kelýime múmkindik beredi. Kelesi joly taýly aımaqtardy kóretin bolamyn», — dedi Ahmet Bashı.
Túrkistan — bıyl Túrki áleminiń týrıstik astanasy mártebesine ıe bolǵany málim. Osyǵan oraı, jyl sońyna deıin halyqaralyq deńgeıde túrli formatta aýqymdy is-sharalar uıymdastyrý kózdelýde.
Jalpy Túrkistan halyqaralyq áýejaıy arqyly Stambýl jáne El-Kýveıtke, Qazaqstan ishinde Astana, Almaty, Qaraǵandy, Oral, Aqtóbe jáne Aqtaý qalalaryna reıster turaqty ushady.
