Kelesi qazaq ǵaryshkeri ǵaryshtyń ǵylymı baǵdarlamasy daıyn bolǵanda shyǵady - Aıdyn Aıymbetov

ALMATY. KAZINFORM – Almatyda IQ BBQ ǵylymı-mýzykalyq festıvali ótti. Aýqymdy is-sharanyń qonaǵy bolǵan QR ushqysh-ǵaryshkeri, QR Halyq Qaharmany Aıdyn Aıymbetov kelesi qazaq ǵaryshkeri qashan shyǵýy múmkin ekenin aıtty.

Onyń sózinshe, búgingi kúni qazaqstandyq ǵylymı ınstıtýttar ǵaryshtyń ǵylymı-zertteý baǵdarlamasyn daıyndap jatyr.

- Qazirgi ýaqytta ǵylymı-zertteý baǵdarlamasy daıyndalyp jatyr. Onsyz ǵaryshkerdi jaı ǵana ǵaryshqa jiberýdiń máni bolmaıdy. Osy ǵylymı baǵdarlama daıyn bolǵan kezde kelesi ǵaryshkerdiń aty atalady. Úmitkerlerdi tabý qıyn bolmaıdy dep oılaımyn. Óıtkeni qazirgi jastar myqty. Bizdiń kezde kóbi salaýatty ómir saltyn ustana bermese, búgingi jastar sportqa jaqyn jáne ǵylym-bilimge umtylady, - dedi ol.

Sondaı-aq Aıdyn Aıymbetov Qazaqstan beıbit maqsatta ǵaryshty zertteýge kóbirek kóńil bólýi kerek ekenin atap ótti.

- Ǵaryshqa birnárse jibergende «onyń ne qajeti boldy, odan da aqshany bárine bólip bereıik» degen áńgimeler bolady. Ony taratqanda ári ketse 10 myń teńgeden bóliner, adamdar ony bir kúnde iship-jep qoıady. Aı baǵdarlamasyn alaıyq, onda eshqashan atmosfera bolǵan joq. Biraq sol jerde jınalǵan materıaldar álemniń paıda bolýynyń qupııasyn ashýy múmkin. Ǵaryshtaǵy asteroıdtar tas kúıinde ǵana emes, temirden ne altynnnan quralǵan bolýy múmkin. Mine, osyndaı nárselerdi zertteýimiz kerek. Al eger «ony qaıtemiz, aqshany taratyp bereıik» dep júre bersek, onda damyǵan elderdiń artynan ǵana júremiz, - dedi ǵaryshker.

Aıta ketken jón, Aıdyn Aıymbetov 2015 jylǵy 2-qyrkúıekte ǵaryshqa ushyp, onda 10 kún boldy. Osylaısha ol úshinshi qazaq ǵaryshkeri atandy.

Eske salaıyq, Almatyda demalys kúnderi gastronomııalyq festıval ótti.