Kelesi Azıadaǵa myqty bolyp oralýǵa ýáde beremin – tennısshi Beıbit Juqaevpen suhbat

23 jastaǵy qazaqstandyq tennısshi Beıbit Juqaev Shanhaı masters týrnıri men HІH Azııa oıyndaryndaǵy ónerine qatysty pikir bildirdi, dep habarlaıdy Kazinform.

- Beıbit, Shanhaıda alǵash ret masters jarysynda oınadyń, ondaǵy ónerińdi qalaı baǵalaısyń?

- Atalmysh týrnır men úshin tabysty boldy dep esepteımin. Qıyn matchtarǵa daıyndaldym, basqasha bolýy múmkin emes te edi. Kútkenimdeı, irikteý saıystarynan bastap oıyndar ońaı bolǵan joq. Masters dodasynyń alǵashqy aınalymyndaǵy kezdesýim psıhologııalyq turǵyda óte kúrdeli boldy. Soǵan qaramastan, jınala bilip, matchty jeńispen túıindedim.

- Ekinshi aınalymda álemniń 14-raketkasy – reseılik Karen Hachanovqa qarsy turýǵa týra keldi. Ony jeńetindeı múmkindigiń boldy ǵoı!?

- Iá, bul básekede mundaı iri jarystardaǵy tájirıbemniń joqtyǵy jáne bálkim, ózime degen senimdiliktiń jetispeýi áser etken shyǵar. Shynynda eki sette jeńýge bolatyn edi. Birinshi partııada taı-breıkte azdaǵan qate jiberip, utylyp qaldym, ekinshi sette ese qaıyrdym. Úshinshi, sheshýshi settiń basynda qarsylasymnyń breık jasaýyna múmkindik berip qoıdym. Birshama teń dárejede ótken oıynda jeńilý ókinishti-aq. Degenmen qateliktermen jumys jasap, Qytaıda qaldym. Shenchjendegi chellendjer jarysynyń shırek fınalyna deıin jettim. Shırek fınalda belorýssııalyq Egor Gerasımovten de ótýge bolatyn edi. Biraq ekinshi partııanyń bas kezinde jaraqat alyp, ol da kedergi keltirdi.

- Azııa oıyndary jóninde ne aıtasyń?

- Azıada men úshin tabysty bola qoıǵan joq. Óıtkeni jaraqatyma baılanysty 5-6 apta úzilisten keıin kortqa shyqtym. Degenmen, Azııa oıyndarynda budan da jaqsy oınaı alatynymdy sezindim. Kelesi Azıadaǵa myqty bolyp oralyp, júlde úshin kúresemin dep ýáde beremin.

- Jyldyń aıaqtalýyna eki aı ýaqyt qaldy. Seni endi qandaı dodalarda kóre alamyz?

- Jyl sońyna deıin Qytaıda taǵy bir jarysqa baryp, Amerıkada eki chellendjer týrnırinde baq synamaqpyn. 2024 jylǵy Aýstralııa ashyq chempıonatynyń irikteý saıystaryna qatysý úshin qajetti upaıdy jınaýǵa tyrysamyn.

- Beıbit, áńgimeńe rahmet. Aldaǵy jarystarda tabys tileımin.