Keles aýdanynda jurtty jumysqa ornalastyramyn dep aldaǵan alaıaq ustaldy
KELES. QazAqparat – Túrkistan oblysy, Keles aýdanynda jurtty jumysqa ornalastyramyn dep aldaǵan alaıaq ustaldy. Jábirlenýshilerge 1,5 mln teńge shyǵyn keltirgen kúdikti qamaýǵa alyndy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, alaıaq aýdan turǵyndaryn ár túrli ýádelermen aldap júrgen. Máselen, jábirlenýshilerdiń biri kúdiktiniń «aýrýhanaǵa jedel járdem bólimine júrgizýshi retinde jumysqa ornalastyryp beremin» jáne «júrgizýshi kýáligińdi jasap beremin» dep aldap, mıllıon teńgesin alyp ketkenin kórsetken. Aýdandyq polıtsııa bólimine osyǵan uqsas aryzdarmen taǵy birneshe turǵyn kelgen. Olar da kúdiktige 75 - 250 myń teńgeniń aralyǵynda aqsha bergenin aıtqan. Osydan keıin polıtseıler qylmysty QR QK-niń 190-baby «Alaıaqtyq « boıynsha tirkep, sotqa deıingi tergep-tekserý amaldaryn júrgizgen. Tájirıbeli tártip saqshylarynan jedel tergeý toby qurylyp, turǵyndardy arbaýyna túsirgen alaıaq táýlik ishinde ustaldy. Ol jergilikti turǵyn bolyp shyqty.
«Kúdikti buryn osyndaı alaıaqtyq isteri úshin sotty bolǵan. Jaýap alý kezinde óz kinásin tolyq moıyndady. Tergeý barysynda onyń osylaı alaıaqtyq jolmen 5 turǵyndy aldaǵany anyqtaldy. Jınaqtalǵan is-qujattary sotqa joldandy», delingen habarlamada.
