Keles aýdanynda «Jaıdarman» kóńildi tapqyrlar saıysy bolyp ótti

KELES. QazAqparat – Túrkistan oblysynyń Keles aýdanynda «Jaıdarman» kóńildi tapqyrlar saıysy bolyp ótti. «Sanaly urpaq jarqyn bolashaq!» taqyrybyndaǵy oıyndar Nur Otan partııasynyń 20 jyldyǵy men «Jastar jyly» aıasynda uıymdastyryldy, dep habarlaıdy QazAqparat tilshisi.

Kóńildi saıysty tamashalaýǵa Keles aýdanynyń turǵyndary men jastary kóptep jınaldy. Saıysqa elimizge tanymal, joǵary jáne premer lıga komandalary arasynda baq synap júrgen 10 top qatysty.

Oıyndy Keles aýdanynyń «Erke qyzdar» jaıdarman quramasy ashyp berip, Qazyǵurt aýdanynyń «T.Rysqulov jastary» komandasy jalǵastyryp áketti. Odan keıin Saryaǵash aýdanynyń «Saryaǵash quramasy», Shardara aýdanynyń «Tórt qaqpa» quramasy, Keles aýdanynyń «Elıta» quramasy óner kórsetti. Shymkent qalasynan kelgen «Dostyq ulandary» men Arys qalasynyń «Qyzyq jigitter» quramasy tapqyrlyqtaryn baıqatty. Tapqyrlar klýbynda jastar qoǵamdy rýhanı jańǵyrtýdyń ıdeıalary men qundylyǵyn kórsetetin shyǵarmalaryn damytý, qoldaý men nasıhattaıtyn oılar aıtty.

Qazaq tiliniń qoldaný aıasyn keńeıtý men jastar arasynda dostyq qarym-qatynas ornatý, patrıottyq sezim qalyptastyrýǵa qatysty uǵymdardy jetkizýge tyrysty.

Saıystyń bas júldesin Shymkent qalasynan kelgen «Kapıtan» quramasy ıelense, birinshi jáne ekinshi oryndar Arys jáne Maqtaral aýdandarynan kelgen jaıdarmanshylarǵa buıyrdy. Kórermen kózaıymy nomınatsııasyna Shymkenttiń «Búgin.kz» quramasy laıyq dep tanylsa, ákimniń arnaıy júldesimen «Mıllıon» quramasy marapattaldy.