Keles aýdanynda jańa mektep paıdalanýǵa berildi

KELES. QazAqparat –Túrkistan oblysy, Keles aýdanynda Tuńǵysh Prezıdent kúnine oraı jańa mektep paıdalanýǵa berildi. Birtilek aýyldyq okrýginde eski ǵımarat janynan salynǵan nysan 300 oqýshyǵa laıyqtalǵan, dep habarlaıdy QazAqparat tilshisi.

Bilim uıasynyń ashylý saltanatyna aýdan basshysy Aqmentaı Esbaev qatysyp, eldi meken turǵyndaryn aıtýly merekemen quttyqtady. Atalǵan bilim ordasynda balalar bilim alyp, salaýatty ómir saltyn ustaný úshin barlyq jaǵdaı jasalǵan.

Aıta keteıik, buǵan deıin yńǵaılastyrylǵan mektepte sport zaly, ashana, qosymsha úıirmeler júrgizý úshin synyp bólmeleri jetispeı kelgen. Endi jańa ǵımaratta bul olqylyqtar joıylyp otyr. Munda sport zaly, tigin, aǵash ustasy syndy túrli úıirmelerdiń jumys jasaýyna múmkindik mol. Atalǵan mektep qurylysyna 425 mln teńgeden astam qarajat jumsalyp, tıisti jumystardy «Qurylys T.A» jaýapkershiligi shekteýli seriktestigi júrgizgen. Budan bólek, aýdan kóleminde Aqtóbe men Qoshqarata aýyldyq okrýginde de mektepterdiń janynan qosymsha qurylystar bastalyp ketti. Atalǵan nysandar kelesi jyly paıdalanýǵa beriledi dep josparlanyp otyr.