Keles aýdanynda plastıkalyq otalar jasalýda
KELES. QazAqparat – Túrkistan oblysynyń Keles aýdandyq aýrýhanasynda kúıikten keıingi tyrtyqtardy qalpyna keltiretin plastıkalyq otalar jasala bastady, dep habarlaıdy QazAqparat.
«Sońǵy bir jarym jylda kúıikten keıin jáne ózge de jaraqat saldarynan paıda bolǵan tyrtyqtardy qalypqa keltiretin 7 ota jasadym. Buryn bizdiń aýrýhanamyzda mundaı múmkindik bolmaǵan edi. Ota sapasy 100%-ǵa jaqsy nátıje kórsetti. Sondaı-aq, 2017 jyldan bastap, túrli kólik apattarynan jaraqat alyp, aıaq-qoly synǵan naýqastardyń tirek-qımyl múshelerine kishkentaı tilikpen arnaıy plastıkalyq metal qoıý ádsin qolǵa aldyq. Bul tásil jara ornynyń tez arada bitip ketýine múmkindik beredi. Sonymen qatar, osyndaı otalardan keıin naýqastarǵa gıps qoıylmaıdy. Nátıjesinde emdelýshilerdiń býyny qozǵalysta bolyp, kelesi kúni aıaq-qoldaryn qımyldata alady», - deıdi Keles aýdandyq aýrýhanasynyń hırýrg-travmatolog dárigeri Ǵalymjan Berdanov.
Sondaı-aq, ol taıaýda neırohırýrgııa baǵytyndaǵy otalardy da qolǵa alǵan. Buryn joǵary qan qysymynan mıyna qan quıylǵan azamattarǵa ota tek elimizdiń iri medıtsınalyq ortalyqtarynda jasalyp kelgen. Al bıyldan bastap jańa tehnologııalardyń kómegimen Keles aýdandyq aýrýhanasynda neırohırýrgııa baǵytynda 4 ota jasalǵan.
Avtor: Álıhan Asqaruly
