Keler jyly kókónis egetinderge 100 mlrd teńgeniń forvardtyq nesıesi bólinedi
«Tórtinshi másele – agrobıznes ekonomıkalyq damýdyń taǵy bir qozǵaýshy kúshine aınalýǵa tıis. Bul eń aldymen elimizdiń azyq-túlik qaýipsizdigin qamtamsyz etý jáne azyq-túlik ınflıatsııasyn azaıtý úshin strategııalyq mańyzy bar sala. Osy oraıly sátte men elimizdiń barsha dıqandaryna, aýyl sharýashylyǵy mamandaryna taǵy da rızashylyǵymdy bildiremin», - degen Prezıdent bıyl astyq jınaý naýqany tabysty aıaqtalǵanyn eske saldy.
«Eginimiz bitik shyqty – rekordtyq ónim, ıaǵnı, 23 mln tonna dándi daqyl jınaldy. Fermerlerge memleket tarapynan qoldaý kórsetý mindetti túrde jalǵasyn tabady. Osy jyldan bastap aýyl sharýashylyǵy tehnıkasyn jeńildikpen lızınge alý úshin beriletin qarjynyń kólemi 40 mlrd teńgege kóbeıdi. Sonyń arqasynda dıqandarymyz 1000-nan astam qosymsha tehnıka alý múmkindigine ıe boldy.
Sondaı-aq, egin egý jáne ony jınaý jumystaryna jeńildikpen nesıe berý kólemi eki ese artty. Al dıqandarǵa jeńildikpen beriletin janar-jaǵarmaı ónimderiniń kólemi 820 myń tonnaǵa deıin ósti. 2023 jyldan bastap kókónis ónimderin shyǵarý úshin fermerlerge aldyn ala, ıaǵnı, forvardtyq nesıe berý baǵdarlamasy iske qosylady. Osy maqsatqa shamamen 100 mlrd teńge qarjy bólinedi», - dedi Memleket basshysy.
Aıta keteıik, osynaý saltanatty shara aıasynda úzdik dep tanylǵandarǵa «Qazaqstannyń úzdik taýary», «Qazaqstan Project Management Awards -2022», «TMD boıynsha sapa salasyndaǵy 2021 jyldyń syılyǵy» sııaqty kásipkerlik baǵyttaǵy marapattar da tabystaldy.
Sondaı-aq, «ArýAna», «Bıznes Kemeldilik», «Іsker», «Uly dala eli» syılyqtarynyń jeńimpazdary da marapattaldy.
Bıyl «Altyn sapa» syılyǵyna 281 úmitker ótinim tapsyrǵan. Sarapshylar sonyń ishinen iri, orta jáne shaǵyn bıznes boıynsha 14 bıznes nysanyn 4 atalym negizinde iriktep aldy.