Keler jyly elordalyq medıtsına qyzmetkerleriniń jalaqysy ósedi – Altaı Kólginov

ASTANA. QazAqparat – Kelesi jyly dárigerlerdiń jalaqysyn taǵy 35 paıyzǵa, al orta personaldyń jalaqysyn 10 paıyzǵa arttyrý josparlanyp otyr. Bul týraly Astana qalasynyń ákimi Altaı Kólginov áleýmettik jelidegi resmı paraqshasynda jazdy, dep habarlaıdy QazAqparat tilshisi.

«2020 jyldan bastap dárigerlerdiń ortasha jalaqysy 60 paıyzǵa, orta býyn medıtsına qyzmetkerleriniń jalaqysy 50 paıyzǵa ósti. Kelesi jyly dárigerlerdiń jalaqysyn taǵy 35%-ǵa, al orta býyn medıtsına qyzmetkerleriniń jalaqysyn 10%-ǵa arttyrý josparlanyp otyr», - dep jazdy elorda ákimi óziniń resmı Instagram paraqshasynda.

Budan ózge, shahar basshysy Astanada jańa aýrýhanalar boı kóteretinin málimdedi.

«Elordanyń aýqymdy jobalarynyń biri temir jol aýrýhanasynyń (№3 kópsalaly qalalyq aýrýhana) «Ramada Plaza» ǵımaratyna kóshýi bolyp sanalady. Eski aýrýhanasynyń aýmaǵyna jańa perınataldyq ortalyq salynady. Óıtkeni, bul shaǵyn aýdanda osy másele (Saryarqa aýdany) óte ózekti bolyp tur. Budan bólek, Almaty aýdanynda №1 kópsalaly qalalyq aýrýhanasynyń janynda taǵy bir perınataldyq ortalyq salynady.

Qadamdyq qoljetimdilik aıasynda sońǵy 3 jylda 40 «Úı janyndaǵy dáriger» nysany (onyń 7-eýi eldi mekenderde ornalasqan) ashyldy. Jyl sońyna deıin taǵy 10 nysan ashýdy josparlap otyrmyz. Oǵan da jeke ınvestıtsııalardy tartamyz», - dep aldaǵy jumystardyń josparyn jarııalady elorda ákimi.

Qosa ketsek, buǵan deıin Altaı Kólginov Esil ózeni arqyly ótetin Táýelsizdik dańǵylyndaǵy kópir kelesi jyly ashylatynyn málimdegen edi. Onyń aqparatyna sáıkes, bul kópir Táýelsizdik dańǵyly, jańa temirjol vokzaly, Qoshqarbaev dańǵyly, Nájimedenov kóshesi, Áziret Sultan meshiti, Baıtursynov kóshesi, Qordaı, Aınakól, Momyshuly dańǵyly men sol jaǵalaý arasyndaǵy qosymsha baılanysty qamtamasyz etedi.

Foto: instagram.com/altay_kulginov_official/