Keler jyly Aqtóbe oblysynyń 100% halqy sapaly aýyz sýmen qamtylady

NUR-SULTAN. QazAqparat – Aqtóbe oblysynda halyqtyń 97 paıyzy aýyz sýmen, 93 paıyzy – gazben qamtylǵan. Bul týraly Aqtóbe oblysynyń ákimi Ońdasyn Orazalın aıtyp berdi, dep habarlaıdy QazAqparat tilshisi.

«Búgingi kúni, oblys halqynyń 97,2% taza aýyz sýmen qamtamasyz etilgen, atap aıtqanda, ótken jyly biz jalpy halqy 5 myń adamdy quraıtyn 10 aýyldy sýmen qamtamasyz ettik. Bıyl 23 myńǵa jýyq halqy bar 11 aýyldy ortalyqtandyrylǵan aýyz sýmen jáne 39 aýyldy keshendi blok-modýldermen qamtý josparlanýda», - dedi O. Orazalın Ortalyq kommýnıkatsııalar qyzmetinde ótken baspasóz máslıhatynda.

Óz sózinde óńir ákimi Memleket basshysynyń 2025 jyly halyqtyń 100%-in sapaly aýyz sýmen qamtamasyz etý mindetin eske saldy.

«Degenmen, qabyldanyp jatqan sharalardyń arqasynda biz bul kórsetkishti 2023 jyly oryndaýdy josparlap otyrmyz. Kógildir otynmen qamtý máselesine kelsek, 2021 jyly 10 myńnan astam halqy bar 16 aýyldy gazben qamtamasyz ettik. Bıyl 9 aýylǵa kógildir otyn jetkizip, oblystaǵy gazben qamtylǵan halyq úlesin 93,4%-ke jetkizemiz. Biraq bul jerde túsinistikpen qaraýymyz kerek, buryn qala mańyndaǵy, aýdan ortalyqtary gazben qamtylsa, qazir shalǵaıdaǵy aýyldarǵa gaz jetkizý mindetteri tur. Eń iri oblys bolǵandyqtan, sol aýyldarǵa gaz jetkizý úshin keminde 100-150 shaqyrym gaz qubyryn tartý kerek. Bul úlken qarajatty qajet etedi. Degenmen, bul jumystardy jalǵastyramyz», - dedi Ońdasyn Orazalın.