Keler jyly 90 jasqa tolatyn S. Zımanovtyń qurmetine mádenı sharalar, ǵylymı konferentsııalar uıymdastyrylsa ıgi - I. Elekeev
ASTANA. Sáýirdiń 14-i. QazAqparat /Qanat Mámetqazyuly/ - Keler jyly 90 jasqa tolatyn S. Zımanovtyń qurmetine mádenı sharalar, ǵylymı konferentsııalar uıymdastyrylsa ıgi. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Iraq Elekeev Premer-Mınıstrden osy máselege qatysty qoldaý bildirýdi surady,
dep habarlaıdy QazAqparat.
«S. Zımanov Qazaqstan memleketi men quqyǵynyń tarıhyn, respýblıkadaǵy jáne Ortalyq Azııa aımaǵyndaǵy ulttyq memleket jáne ulttyq-memlekettik qurylys teorııasy máselelerin zertteýde jańa ǵylymı baǵytty qalyptastyrýshy. Onyń quqyq jáne zań shyǵarý isiniń asa mańyzdy teorııalyq jáne metodologııalyq máselelerin zertteýge arnalǵan eńbekteri de aıryqsha qundy. Táýelsiz Qazaqstannyń Konstıtýtsııasyn ázirleýge belsene atsalysqan daryndy zańger. Ol Ata Zańymyzdyń árbir baby men tarmaǵy demokratııalyq ustanymdarǵa sáıkes bolýyna basa nazar aýdardy. Osyndaı elge syıly, halqyna qadirli azamattyń ortamyzda júrgeniniń ózi bereke. Onyń ómir joly - óskeleń jastarǵa úlgi. Keler jyly Salyq Zımanuly 90 jasqa tolady. Qazir on aıdaı ýaqyt qaldy. Osy oraıda onyń týǵan kúnine baılanysty mádenı sharalar, ǵylymı konferentsııalar ótkizý máselesi aldyn ala Mádenıet, Ádilet, sondaı-aq Bilim jáne ǵylym mınıstrlikteriniń jyldyq josparlaryna engizilgeni jón dep oılaımyn», dedi depýtat I. Elekeev.
Memleket jáne qoǵam qaıratkeri Salyq Zımanov 1921 jyly aqpannyń 19-ynda týǵan. Soǵysqa deıin muǵalim bolyp eńbek etti. 1940 jyly Salyq Zımanuly ásker qataryna shaqyrylady. Al Uly Otan soǵysy bastalǵan kezde ol Bas Kavkaz jotasynda jaýdyń jolyn bógeıdi. Budan keıin Keńes Odaǵy áskeriniń quramynda Kýban, Voronej, Harkov, Kırovograd, Kremenchýk qalalaryn azat etýge, Dantsıg, Kenısberg qalalaryn alýǵa qatysqan. Osylaısha Berlınge de jetip, jeńis týyn qadaýǵa úles qosty. Polk shtabynyń bastyǵy bolǵan gvardııa maıory Salyq Zımanovtyń maıdandaǵy erlik joly І-inshi jáne ІІ-inshi dárejeli Otan soǵysy, «Qyzyl juldyz» ordenderimen jáne kóptegen medaldarmen, sonyń ishinde «Kavkaz qorǵanysy úshin» medalmen baǵalanǵan. Soǵystan keıin Búkilodaqtyq zań ınstıtýtynyń Qazan fılıalyn jáne KSRO Ǵylym Akademııasynyń Memleket jáne quqyq ınstıtýtynyń aspırantýrasyn oıdaǵydaı támamdady. S. Zımanov - zań ǵylymdarynyń doktory, professor. Qazaqstan Ǵylym Akademııasynyń akademıgi. Ol - kórnekti ıýrıst-teorıtıkterdiń biri, tanymal memleket zertteýshisi, Qazaqstandaǵy qoǵamdyq-saıası oı tarıhynyń shejireshisi, qazaqtyń ádet-ǵuryp quqyǵynyń bilgiri, ári respýblıkadaǵy fılosofııa men quqyq ǵylymyn, sondaı-aq oqý-aǵartý isin uıymdastyrýshy.
