Keler jyly 15 tomdyq qazaq tiliniń túsindirme sózdigi jaryq kóredi - Úkimet otyrysy
ildeniń 26-sy. QazAqparat /Marlan Jıembaı/ - Keler jyly 15 tomdyq qazaq tiliniń túsindirme sózdigi jaryq kóredi. Bul týraly búgin Úkimette Premer-Mınıstr Kárim Másimovtiń tóraǵalyǵymen ótip jatqan Tildirdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń jobasyn talqylaýǵa arnalǵan keńeıtilgen májilistiń otyrysynda QR Mádenıet mınıstri Muhtar Qul-Muhammed málim etti.
18 ǵasyrdan bergi Reseıde jaryq kórgen sózdikterdi sholyp ótken mınıstrdiń aıtýynsha, olardyń sózdik qory 40 myńnan 180 myńǵa deıin ósken. Bul oraıda ol, olardyń tildik qoryn baıytý barysynda halyqaralyq termındik sózderdi aýdarmastan, sózdik qorlaryna qosqandyǵyn aıtady. Osyǵan oraı, qazaq tiliniń termındik qoryn qalyptastyrý barysynda, bizdiń de osy jolmen júrgenimiz oń bolady dep paıymdaıdy.
Onyń aıtýynsha, álem tilderinde erkin qoldanylatyn pasport, mýzeı, arhıv degen sózderdi oryndy-orynsyz qazaqshalaýdyń ornyna, aǵylshyn tilderinde, halyqaralyq tilderde qoldanylatyn termın sózderdi batyl engizip, tildik qorymyzdy jetildirý kerek.
«Endeshe qazaq tiliniń termındik qoryn qalyptastyrýda aldaǵy ýaqytta osy baǵytty ustanýymyz qajet. Kelesi jyly biz osy baǵdarlama aıasynda 15 tomdyq qazaq tiliniń túsindirme sózdigin shyǵarýdy aıaqtaımyz», - dedi M.Qul-Muhammed.
Bul oraıda til bilimi ınstıtýtynyń qazirgi ýaqytta atalǵan eńbektiń 12-13-shi tomdaryn ázirlep jatqandyǵyn aıtqan mınıstr, «kelesi jyly úsh tomy jaryq kóretin bolsa, birinshi ret qazaq halqynyń tarıhynda 150 myń qazaq sózi qamtylǵan 15 tomdyq qazaq tiliniń túsindirme sózdigi jaryq kóredi. Bul bárimizdiń ana tilimiz, barsha qazaqstandyqtardyń memlekettik tiliniń álemge eń baı tilderdiń biri ekendigin soqyrǵa taıaq ustatqandaı, taıǵa tańba basqandaı dáleldeıtin bolady», - dedi.
