Keler jyldan jol-kólik oqıǵasyna qatysty daýlardy polıtseılerdiń qatysýynsyz sheshetin norma engiziledi

ASTANA. QazAqparat – Keler jyldan bastap jol-kólik oqıǵalaryn polıtsılerdiń qatysýynsyz derbes sheshýge múmkindik beretin jańa norma engiziledi. Bul týraly «Ashyq» NQA portalynda jarııalanǵan Qoǵammen áriptestikte qoǵamdyq qaýipsizdikti qamtamasyz etýdiń 2024-2028 jyldarǵa arnalǵan tujyrymdamasynda aıtylǵan, dep habarlaıdy QazAqparat tilshisi.

«2024 jyldan bastap jol-kólik oqıǵasyna qatysýshylardyń polıtsııa qyzmetkerleriniń qatysýynsyz onlaın-tirkeýmen jol-kólik oqıǵalary kezinde daýlardy derbes sheshýdiń ońaılatylǵan rásiminiń normalary kúshine enedi (eýrohattama). Bul sharalar azamattardyń sot isin júrgizýge ketetin ýaqytyn únemdeýge múmkindik beredi. Jalpy, bul basqa da azamattyq shaǵymdardy sheshýmen aınalysatyn sot organdaryna túsetin salmaqty da azaıtady. Óz kezeginde, patrýldik polıtsııa qyzmetkerleri qoǵamdyq qaýipsizdikti qamtamasyz etý qyzmetine tartylady», - dep jazylǵan mınıstrliktiń 4 jyldyq josparǵa engizgen málimetterinde.

Vedomstvo aqparatyna saı, buǵan deıin mas kúıinde kólik basqarǵandarǵa qatysty jaýapkershilik kúsheıtilgen.

«Mas kúıinde kólik quraldaryn basqarý jáne mas kúıin medıtsınalyq kýálandyrýdan ótýden jaltarý úshin jaýapkershilik kúsheıtildi. Jolaýshylar tasymalyn júzege asyrý, kólik quraldarynyń tehnıkalyq jaı-kúıine baqylaýdy kúsheıtý jónindegi normalarǵa túzetýler engizildi. Ýákiletti memlekettik jáne jergilikti atqarýshy organdar baǵdarlamalyq qujattar sheńberinde jol júrisi qaýipsizdigin arttyrý jónindegi maqsatty sharalardy iske asyrdy», - dep jazylǵan ІІM taldaý qujatynda.