Keler jyldan óńirlik bazalarda medıtsınalyq mamandyqtar boıynsha biliktilik emtıhandary ótkizilmek
ASTANA. QazAqparat - 2015 jyldan bastap óńirlik sımýlıatsııalyq ortalyqtar bazasynda ártúrli beıindegi jáne deńgeıdegi medıtsınalyq mamandyqtar boıynsha biliktilik emtıhandaryn ótkizý josparlanyp otyr. Bul týraly QR DSÁDM baspasóz qyzmeti habarlady.
Búgingi tańda Qazaqstan Respýblıkasy Densaýlyq saqtaý jáne áleýmettik damý mınıstrligi densaýlyq saqtaý salasynda biliktilik emtıhandaryn ótkizýdi jetildirý maqsatynda biliktilik sanatyna úmitker klınıkalyq mamandyqtary bar dárigerler úshin olardyń bilimi men praktıkalyq daǵdylaryn baǵalaý júıesin engizý arqyly aýqymdy jumystar júrgizdi.
Bul jańashyldyq biliktilik sanatyn alýǵa úmitker mamandar ǵana qatysty. Joǵary, birinshi jáne ekinshi biliktilik sanattaryna úmitkerler praktıkalyq daǵdylary men bilimderin baǵalaý barysynda koronarlyq sındrom kezinde, anafılaktıkalyq shok kezinde jedel járdem kórsetý, kenetten júrek toqtaǵan kezde, tynys alý joldarynyń asfıksııasy kezinde jedel kómek kórsetý jáne emdeýge jatqyzýǵa deıingi hırýrgııalyq kómek kórsetý daǵdylaryn qashalyqty meńgergenderin kórsetti.
Dárigerlerdiń bilimderi men praktıkalyq daǵdylaryn baǵalaýdy arnaıy oqytylǵan táýelsiz akkredıttelgen medıtsınalyq sarapshylardan, ǵylymı dárejesi men joǵary sanaty bar dárigerlerden turatyn emtıhan qabyldaýshylar júrgizdi. Baǵalaý sımýlıatsııalyq jabdyqtardy qoldana otyryp jáne naýqasty shynaıy beıneleýge úıretilgen «standartty patsıentterdiń» qatysýymen ótkizildi, sımýlıatsııalyq orta kúndelikti bolatyn medıtsınalyq jaǵdaılarǵa barynsha jaqyndastyryldy.
Biliktilik sanatyn berý emtıhandaryn ótkizý erikti túrde bolǵanyna qaramastan, aǵymdaǵy jyldyń ekinshi jarty jyldyǵynda Qazaqstan Respýblıkasy boıynsha baǵalaý kezeńinen 3400 dáriger ótti, onyń ishinde úmitkerlerdiń 77 paıyzy (2600 dáriger) emtıhandy jaqsy qortyndymen aıaqtady. Bul baǵalaý úrdisi alǵash ret qoldanylyp otyrǵandyqtan, jaqsy kórsetkish bolyp sanalady.
Attestattaý komıssııa músheleri men emtıhan tapsyrǵan dárigerler baǵalaýdy engizýge oń pikirlerin bildirip otyr, sebebi densaýlyq saqtaý salasyndaǵy mamandardyń kásibı deńgeıin men biliktiligin anyqtaýda formaldy kózqarastyń joıylýyna, obektıvti túrde baǵalaýǵa múmkindik paıda bolǵanyn, sonymen qatar ol halyqqa kórsetiletin medıtsınalyq kómek sapasynyń jaǵarylaýyna zor yqpalyn tıgizetinin atap kórsetti.
Mınıstrliktiń buıryǵymen oblystyq densaýlyq saqtaý basqarmalarynda 16 óńirde óńirlik sımýlıatsııalyq ortalyqtardyń ashylýy jalǵasýda. Respýblıkalyq bıýdjet esebinen atalǵan ortalyqtar zamanaýy sımýlıatsııalyq jabdyqtarmen jaraqtandyrylǵan.
