Keler jyly Ózbekstan TMU-ǵa múshe eldermen birlesip ǵaryshǵa spýtnık ushyrmaq

TAShKENT. KAZINFORM – Bul týraly Aqparat jáne buqaralyq kommýnıkatsııalar agenttiginde ótken baspasóz máslıhatynda «Ózbekǵaryshtyń» aeroǵaryshtyq qyzmet jáne ǵarysh monıtorıngi júıelerin damytý bóliminiń bastyǵy Mýhıddın Ibragımov málim etti, dep habarlaıdy Kazinform agenttiginiń menshikti tilshisi.

- Búginde Ózbekstan 600 myńnan 1 mln sharshy shaqyrymǵa deıingi aýmaqty qamtıtyn spýtnık sýretterin ózi óńdeı alady. Qazir biz jerdi qashyqtan zondtaýmen aınalysatyn jerserikterdi iske qosýdy josparlap otyrmyz. Ol úshin tıisti usynystar ázirlep jatyrmyz jáne birneshe elmen kelissóz bastadyq, - dedi Mýhıddın Ibragımov.

Sondaı-aq, spıker Túrki memleketteri uıymyna múshe eldermen birlesken zertteý jobasy qolǵa alynǵanyn atap ótti. Mýhıddın Ibragımovtiń sózinshe, qazir ǵylymı zertteýler júrgizetin spýtnık qurastyrylyp jatyr. Jerserikti jasaýǵa «Ózbekǵarysh» agenttiginiń mamandary da jumyldyrylady.

- Qatelespesem, atalǵan spýtnıkti 2026 jyly ǵaryshqa shyǵarý josparlanǵan. Aıta keteıin, bul jerserik Ózbekstannyń tól ónimi emes, bizdiń mamandar tek keıbir qurastyrý jumystaryna qatysady, - dep túıindedi M.Ibragımov.

Eske salaıyq, byltyr Ózbekstan ǵarysh keńistigin zertteýge baǵyttalǵan halyqaralyq shartqa qosylǵan edi.

Buǵan deıin habarlaǵanymyzdaı, Qazaqstan men Ózbekstan ǵarysh salasyndaǵy seriktestikti nyǵaıtýǵa nıetti.