Keler jyly memlekettik satyp alý erejeleri qalaı ózgeredi

ASTANA. KAZINFORM – 2025 jyldyń 1 qańtarynan bastap memlekettik satyp alý týraly jańa zań kúshine enedi. Qarjy vıtse-mınıstri Dáýren Kenbeıil memlekettik satyp alý rásimderi qalaı ózgeretini jóninde aıtyp berdi.

Vıtse-mınıstrdiń aıtýynsha, eldegi memlekettik satyp alý júıesi 100% elektrondy formatqa kóshirilgen.

— Elektrondyq portalda 24 myń tapsyrys berýshi men 117 myń áleýetti jetkizýshi tirkelgen. Memlekettik satyp alý jospary 9,3 trln teńgeni quraıdy, al búgingi kúnge deıin 8,8 trln teńgege satyp alý júrgizilgen. Onyń ishinde bir kózden satyp alý úlesi jalpy kólemniń 23%-yn quraıdy. Jańa zań satyp alynatyn taýarlardyń, jumystar men qyzmetterdiń sapasyn arttyryp, satyp alý rásimderin jeńildetedi jáne otandyq óndirýshilerdi qoldaıdy, — dedi Dáýren Keńbeıil Ortalyq kommýnıkatsııalar qyzmetinde ótken brıfıngte.

Onyń aıtýynsha, qazir satyp alynatyn taýarlardyń, jumystar men qyzmetterdiń sapasyn arttyrýǵa basymdyq berilýde. Eń aldymen, jetkizýshini tańdaýdaǵy baǵadan tys krıterıılerdi damytý qarastyrylǵan.

— Qazirgi ýaqytta bizde eki negizgi krıterıı bar. Birinshisi — memlekettik kirister bazasyndaǵy áleýetti jetkizýshi týraly aqparat: tólengen salyqtary, qyzmetkerlerge tólenetin jalaqysy jáne qarjylyq turaqtylyǵy. Ekinshisi — eńbek ótili týraly depozıtarıı. Jańa zań aıasynda derekkózderdi keńeıtemiz. Áleýetti jetkizýshiler týraly baǵadan tys aqparatty keńinen paıdalanamyz, — dedi vıtse-mınıstr.

Kelesi jańalyq — qoǵamdyq monıtorıng ınstıtýtyn engizý. Bıylǵy sáýir aıynda «Qoǵamdyq baqylaý týraly» zań qabyldanǵan bolatyn. Qujatta qoǵamnyń belgili bir protsesterge yqpal etý mehanızmi kórsetilgen. Eger qoǵamdyq ókilder memlekettik satyp alý salasynda qandaı da bir kemshilikterdi anyqtasa, olar qoǵamdyq monıtorıng ınstıtýtyn paıdalana alady.

Sondaı-aq, shaǵymdardy qaraýdyń jańa mehanızmi engizilip, baqylaýshy organnyń róli qaıta qaraldy. Satyp alý rásimderin sozý jaǵdaılaryn boldyrmaý úshin qorytyndylardy qaıta qaraý fýnktsııasy satyp alýdy uıymdastyrýshyǵa beriledi. Shaǵymdaný quqyǵy tek konkýrs komıssııasy jeńimpazdardy anyqtaǵan satyp alýlarǵa ǵana beriledi. Satyp alý qorytyndylaryn qaıta qaraý ádisi Ákimshilik rásimdik-protsestik kodeks talaptaryna saı keledi. 
Memlekettik satyp alý salasyndaǵy basty máselelerdiń biri — rásimderdiń uzaqqa sozylýy.

Buryn shaǵymdardy qaraý keminde 45 kúnge sozylsa, endi bul merzim 6 kúnge deıin qysqartyldy.

Buǵan deıin Memlekettik satyp alý týraly zańnyń erekshelikteri jóninde taldaý jarııalanǵan edi.