Keler jyly Qazaqstan barlaý aýmaǵyn aıtarlyqtaı ulǵaıtady
ASTANA. KAZINFORM — Geologııalyq derekterdi tsıfrlandyrýdyń arqasynda Qazaqstan barlyq ınvestor úshin ashyq ári tartymdy bolyp otyr.
Bul pikirdi Ónerkásip jáne qurylys vıtse-mınıstri Iran Sharhan keltirdi.
— Bar áleýetimizdi arttyrý úshin geologııalyq barlaýdy belsendi damytý qajet. Osy maqsatta Batys Aýstralııa qaǵıdatyna negizdelgen jer qoınaýyn paıdalaný modeli engizilip, geologııalyq barlaýǵa 420 mlrd teńgeden astam ınvestıtsııa tartýǵa múmkindik berildi. Qazir geologııalyq barlaý kólemi 1,9 mln sharshy shaqyrymdy qamtyp otyr jáne bul kórsetkish 2026 jylǵa qaraı 2,2 mln sharshy shaqyrymǵa deıin ulǵaıady. CRIRSCO standartynyń engizilýi men geologııalyq derekterdi tsıfrlandyrýdyń arqasynda Qazaqstan barlyq ınvestor úshin ashyqtyq pen teń jaǵdaıdy qamtamasyz etip otyr, — dedi Iran Sharhan elordada ótip jatqan 15-i halyqaralyq taý-ken metallýrgııa kongresinde.
Buǵan deıin habarlaǵanymyzdaı Qazaqstan altyn qory boıynsha TOP-20 eldiń qataryna kirdi.
Sondaı-aq jaqyn arada taý-ken kesheni salasynda 3,5 trln teńgege 5 ınvestıtsııalyq joba iske qosylady dep kútilip otyr.
Aıta keteıik, elordada halyqaralyq taý-ken metallýrgııa kongresi ótip jatyr. Oǵan álemniń 20 elinen 1300 delegat qatysty.