Qazaqstan bıýdjetiniń 35%-y adamı kapıtalǵa jumsalady
ASTANA. KAZINFORM — 2027 jyly respýblıkalyq bıýdjetten adamı kapıtaldy damytýǵa 10,5 trln teńge, ıaǵnı jalpy shyǵystardyń 35%-y baǵyttalady. Qarajattyń negizgi bóligi áleýmettik qamsyzdandyrý men densaýlyq saqtaý salalaryna jumsalady. Bul týraly Qarjy vıtse-mınıstri Abzal Beısenbekuly málim etti.
Spıkerdiń aıtýynsha, bıýdjet jobasynda 5 negizgi baǵyt belgilengen: adamı kapıtalǵa ınvestıtsııalar, óńirlerdi qoldaý, qaýipsizdik jáne memlekettik basqarý, ekonomıkanyń naqty sektory jáne memlekettik boryshqa qyzmet kórsetý.
Birinshi jáne eń basym baǵyt — adamǵa salynatyn ınvestıtsııalar bolmaq.
— Adamǵa jumsalatyn shyǵystar — strategııalyq ınvestıtsııalar sanalady. 2027 jyly adamı kapıtalǵa 10,5 trln teńge nemese jalpy bıýdjettiń 35%-y kózdelgen. Osy sandardyń artynda naqty adamdar turǵanyn túsiný óte mańyzdy. Áleýmettik saladaǵy bıýdjet adamǵa, ıaǵnı onyń áleýmettik qorǵalýyn, densaýlyǵyn, bilimin jáne damý múmkindikterin qamtamasyz etýge baǵyttalǵan, — dedi Abzal Beısenbekuly Quryltaıda ótken tanystyrylymda.
Qarajattyń negizgi bóligi áleýmettik qamsyzdandyrý men densaýlyq saqtaý salasyna tıesili.
— Endi tikeleı 2027 jyl boıynsha aıtsam, áleýmettik kómek pen qamtamasyz etýge jumsalatyn shyǵystar 6,9 trln teńgeni quraıdy. Bul rette áleýmettik qoldaýda ataýly tásil saqtalady, sondyqtan kómek birinshi kezekte shynymen muqtaj adamdarǵa beriledi, — dedi Qarjy vıtse-mınıstri.
Aıta keteıik, Qarjy vıtse-mınıstri Abzal Beısenbekuly Quryltaıda «2027-2029 jyldarǵa arnalǵan respýblıkalyq bıýdjet týraly» Zań jobasyn tanystyrdy.
Buǵan deıin Quryltaı vıtse-spıkeri Danııa Espaeva 2027 jyldyń bastapqy kezeńi áli de kúrdeli kúıinde qalyp otyrǵanyn aıtqan edi.
