Ózbekstan «Qambarata-1» SES-in Qazaqstan jáne Qyrǵyzstanmen birlesip qarjylandyrmaq
TAShKENT. KAZINFORM — «Qambarata — 1» sý elektr stantsııasy jobasyn qarjylandyrý 2026 jyly bastalady. Bul týraly «Turaqty energetıka — Jańa Ózbekstannyń bolashaǵyna senimdi qadam» konferentsııasynda sóz sóılegen Ózbekstan prezıdenti Shavkat Mırzıeev aıtty, dep habarlaıdy Kazinform agenttiginiń menshikti tilshisi.
Áýeli Ózbekstan basshysy keıingi jyldary energetıka salasyndaǵy jobalardy iske asyrýǵa 35 mlrd dollar sheteldik ınvestıtsııa tartylǵanyn atap ótti. Nátıjesinde elektr energııasyn óndirý kólemi 2017 jylǵy 60 mlrd-tan 2025 jyly 85 mlrd kVt/saǵatqa deıin ósti.
Budan bólek, Shavkat Mırzıeev energetıka salasynda Ortalyq Azııa elderi arasyndaǵy yntymaqtastyqtyń júıeli jolǵa qoıylǵanyna toqtaldy.
— Keıingi jyldary birtutas energetıkalyq naryq qalyptastyrý boıynsha kórshi eldermen áriptestikti nyǵaıttyq. Óńirimizdiń gıdroenergetıkalyq áleýetin tıimdi paıdalaný jáne ony birlesip basqarý maqsatynda kelesi jyly Qyrǵyzstan jáne Qazaqstanmen birlesip, «Qambarata-1» sý elektr stantsııasyn salý jobasyn qarjylandyrýǵa kirisemiz. Bul rette, Qazaqstan men Ázerbaıjan basshylyǵynyń Eýropaǵa elektr energııasyn eksporttaýǵa baǵyttalǵan «jasyl dáliz» bastamasyn iske asyrýdaǵy tabandy kúsh-jigerin erekshe atap ótkim keledi, — dedi Shavkat Mırzıeev.
Kórshiles el prezıdentiniń sózinshe, Ózbekstan ekologııalyq taza jolmen óndiriletin elektr energııasynyń úlesin arttyra otyryp, 7 mlrd tekshe metr tabıǵı gazdy únemdeýdi kózdep otyr. Osylaısha, aýaǵa bólinetin zııandy shyǵaryndylardyń kólemi 11 mln tonnaǵa qysqarmaq.
Buǵan deıin habarlaǵanymyzdaı, «Qambarata-1» GES-i Ortalyq Azııanyń energetıkalyq áleýetin nyǵaıta túsedi.
Sonymen qatar, Eýropa Odaǵy Qyrǵyzstanǵa «Qambarata-1» sý elektr stantsııasynyń qurylysyna 1 mlrd dollar bóledi.