Keler jyly ınflıatsııa qanshalyqty tómendeýi múmkin – Ulttyq bank jaýaby
ASTANA. KAZINFORM — Inflıatsııanyń baıaýlaýyna nyǵaıǵan teńge baǵamy yqpal etip otyr. Bul týraly elordada ótken brıfıngide Ulttyq bank tóraǵasy Tımýr Súleımenov málim etti.
- Ulttyq banktiń Aqsha-kredıt saıasaty komıteti bazalyq mólsherlemeni 15,75%-ke deıin, ıaǵnı 50 bazıstik tarmaqqa tómendetý týraly sheshim qabyldady. Biz ınflıatsııanyń dınamıkasyn, onyń faktorlaryn jáne táýekelder balansyn negizge alyp sheshim qabyldadyq. Inflıatsııanyń ósý qarqyny báseńdep keledi. Jyldyq ınflıatsııa jyl boıy baıaýlap, qyrkúıekte 9,3% boldy. Bul ustamdy qatań aqsha-kredıt sharttaryn saqtaı otyryp, búgin bazalyq mólsherleme deńgeıin proportsıonal túrde tómendetýge múmkindik berdi, - dedi T. Súleımenov.
Onyń aıtýynsha, ınflıatsııanyń ósý qarqyny báseńdegeni júrgizilip jatqan aqsha-kredıt saıasatynyń oń nátıjesin kórsetedi. Inflıatsııanyń baıaýlaýyna nyǵaıǵan teńge baǵamy, ornyqqan tutynýshylyq suranys jáne Úkimetpen birge ınflıatsııaǵa qarsy qabyldanǵan sharalar da yqpal etip otyr.
- Inflıatsııanyń tómendeýine qaramastan, ol nysanaly deńgeıden áli de joǵary, al táýekelder balansy proınflıatsııalyq aımaqta saqtalyp otyr. Osyndaı jaǵdaıda biz ustamdy qatań aqsha-kredıt sharttaryn saqtap, baıypty tásildi ustanamyz. Basty mindetimiz – ınflıatsııany 2027 jyly 6,5-8,5% aralyǵynda tómendetip, 2028 jyly ony 5 paıyzdyq nysanaly deńgeıge jaqyn turaqtandyrý, - dedi UB basshysy.
Osy oraıda ol bazalyq mólsherleme boıynsha aldaǵy sheshimder ınflıatsııanyń dınamıkasyna, proınflıatsııalyq táýekelderdi baǵalaýǵa baılanysty bolatynyn aıtty.
Buǵan deıin habarlanǵandaı, QR Ulttyq bankiniń Aqsha-kredıt saıasaty komıteti bazalyq mólsherlemeni jyldyq 15,75% deńgeıinde belgileý týraly sheshim qabyldady.
