Keler jyly halyqtyń shamadan tys nesıe alýyn shekteıtin qural iske qosylady

ASTANA. KAZINFORM — 2026 jyldyń birinshi jartysynda halyqtyń shamadan tys kredıt alýyn shekteıtin qural iske qosylady. Bul týraly Senattyń jalpy otyrysynda Ulttyq bank tóraǵasy Tımýr Súleımenov aıtty.

— Halyqtyń shamadan tys kredıt alýyn shekteý úshin jańa makroprýdentsıaldy qural — kiriske qatysty borysh koeffıtsıenti iske qosylady. Bul qural halyqaralyq praktıkada qaryz alýshylardyń tólem qabiletin baǵalap, olardyń jalpy bereshegin shekteý úshin keńinen qoldanylady. Osy koeffıtsıenttiń naqty máni esepteledi. Ony kelesi jyldyń birinshi jartysynda iske qosýdy josparlap otyrmyz, — dedi Tımýr Súleımenov.

Onyń atap ótýinshe, 2026 jylǵy 1 qańtardan bastap bankterdiń tabysyna saralanǵan salyq salý engiziledi. Bólshek kredıtteýden túsetin kiris boıynsha korporatıvtik tabys salyǵynyń mólsherlemesi 25%, al bıznesti kredıtteý mólsherlemesi 20% bolady.

— Qaryzdy bólip tóleýdiń proınflıatsııalyq áserin tómendetý úshin Úkimetpen jáne agenttikpen birlesip, bólip tóleý naryǵy nemese «qazir satyp al da, keıin tóle» (BNPL) qyzmetin retteý tásilderi ázirlenedi. Úkimetpen tyǵyz jumys isteý — ınflıatsııaǵa qarsy saıasattyń basty elementi. Bıyl jańa Bıýdjet jáne Salyq kodeksteri qabyldandy. Olar memlekettik qarjyny josparlaý sapasy men ony basqarýdaǵy ashyqtyqty, bıýdjettiń óz kirisin arttyrýǵa jáne Ulttyq qorǵa táýeldilikti tómendetýge baǵyttalǵan. Biz bıýdjet shoǵyrlanýyn jáne bıýdjettik qaǵıdalardy qatań saqtaýdy qoldaımyz. Qarastyrylyp otyrǵan áleýmettik-ekonomıkalyq damý boljamy jáne Respýblıkalyq bıýdjet jobasy osy bıýdjettik qaǵıdalardy saqtaı otyryp qalyptastyryldy, — dedi ol.

Aıta keteıik, búgin Senattyń jalpy otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın elimizdiń 2026-2028 jyldarǵa arnalǵan áleýmettik-ekonomıkalyq damý boljamyn tanystyrdy.