Keler jylǵy astyq ónimdiligine qatysty pikir aıtýǵa áli erte - Azat Sultanov
Aýyl sharýashylyǵy vıtse-mınıstri Azat Sultanov elimizdegi astyq shyǵymdylyǵyna qatysty túsinik berdi, dep habarlaıdy Kazinform.
«Qazir keler jylǵy astyq ónimdiligine qatysty naqty birdeńe aıtý áli erte. Keıbir óńirlerde dándi daqyldardy jınaý aıaqtalmady, eginniń 98 paıyzy jınaldy. Toqtaýsyz jaýǵan jańbyrǵa baılanysty qazir jekelegen dándi daqyldardy jınaý jalǵasyp jatyr. Egin jınaýdy aıaqtaǵan kásiporyndar keler jylǵa daıyndalýǵa kirisedi. Tıisti boljamdy tek 2024 jyly kóktemde ǵana aıta alamyz», - dedi Senatta tilshiler suraǵyna jaýap bergen A. Sultanov.
Onyń aıtýynsha, elimizde bıylǵydaı jaýyn-shashyn 10 jyldan beri bolmaǵan.
«Klımattyń áserinen eshkim de saqtandyrylmaǵan. Ásirese, bıyl kúzde jaýyn-shashyn uzaqqa sozylatynyn boljaý múmkin bolmady. Keıbir óńirlerdegi jaz kezindegi qurǵaqshylyqtan keıin tolassyz jańbyr birazǵa bardy. Mundaı jańbyr 10 jyldan astam ýaqyt boıy bolmaǵanyn «Qazgıdromet» rastady. Aýyl sharýashylyǵy taýaryn óndirýshilerdiń osyndaı jaǵdaıda shyǵynǵa batpas úshin egin egý naýqanyn ýaqtyly júrgizip, egin oraǵyn uzaqqa sozyp almaı, tez arada iske asyrý kerek. Eger tehnıka jetkilikti bolsa, jaýyn-shashyn bastalmaı turyp múmkindiginshe mol ónim alýǵa bolady», - dedi vıtse-mınıstr.
Aýyl sharýashylyǵy vıtse-mınıstri iri aýyl sharýashylyǵy kompanııalary jańbyrǵa deıin astyqtyń edáýir bóligin jınap úlgergenin aıtty.
«Bizde halyqty nanmen, unmen, makaronmen qamtamasyz etetin joǵary sapaly astyq bolady. Al sapasy tómen ónimdi mal sharýashylyǵyn damytý úshin jemdik maqsatta paıdalanady. Sharýalarǵa barlyq qajet resýrsty – tuqymdy, tyńaıtqyshty, ósimdikterdi qorǵaý quraldaryn aldyn ala satyp alýy úshin jeńildetilgen nesıeler arqyly kómektesemiz. Memleket basshysynyń tapsyrmasy boıynsha biz aýyl sharýashylyǵy tehnıkasyn jańartýdy jalǵastyramyz», - dedi vedomstvo ókili.
Onyń sózinshe, bıyl keıbir shaǵyn sharýashylyqtar tehnıkasynyń bolmaýynan iri fermerlik qurylymdardyń egin jınap bolýyn kútken. Óıtkeni shaǵyn sharýashylyqtar iri kompanııalardyń tehnıkasyn jalǵa alyp júr. Biraq osy jyly iri aýylsharýashylyq qurylymdary da jaýyn-shashynǵa baılanysty qıyndyqqa tap bolyp, tehnıkany jalǵa berý merzimin keshiktirdi.
Sonymen qatar ol atalǵan qoldaý sharalarynyń ózinde keler jylǵy eginniń ónimdiligi joǵary bolatynyna kepildik bere almaıtynyn jetkizdi.
«Eshkim kepildik bere almaıdy, bul óz kezeginde aýa raıyna da baılanysty. Atap aıtqanda, sharýalarmen birge jaqsy ónim alý úshin tek qajet alǵysharttardy ǵana jasaı alamyz», - dedi vıtse-mınıstr.
