Keler jyly Almaty bıýdjetiniń 41 paıyzy áleýmettik salaǵa baǵyttalady
ALMATY. KAZINFORM – 2025 jyly Almaty bıýdjetiniń 41%-y áleýmettik salaǵa baǵyttalmaq. Bul týraly qala Máslıhaty málimdedi.
– Almatyda 2025 jyly bıýdjet jobasynda áleýmettik salaǵa 806,1 mlrd teńge bólý josparda, bul aldyn ala aqparat boıynsha – qala bıýdjeti shyǵystarynyń 41 paıyzy. Áleýmettik salany qarjylandyrýdy ulǵaıtýdyń boljamdy ósýi – 8,7%. 2024 jyly áleýmettik salaǵa 741,2 mlrd teńge, 2023 jyly 664,5 mlrd teńge baǵyttalǵan bolatyn, – dep habarlady qalalyq Máslıhattan.
2025-27 jyldarǵa arnalǵan bıýdjettiń tıisti jobasy Almaty máslıhatynyń aldaǵy sessııasynda qabyldanady.
Máslıhattyń aldyn ala aqparaty boıynsha, densaýlyq saqtaý ınfraqurylymyn jańǵyrtýdy qarjylandyrý 2025 jyly 2,6 esege – 69,4 mlrd teńgege deıin ulǵaıady. Sondaı-aq 1 326 dáriger men medıtsınalyq personaldy oqytýdyń úsh deńgeıli baǵdarlamasy iske asyrylady.
– Jańa bıýdjetten qarajattyń bir bóligi Bostandyq aýdanynda 500 adam qabyldaıtyn №4 jedel medıtsınalyq járdem qosalqy stantsııasynyń, eki otbasylyq-dárigerlik ambýlatorııanyń jáne jańa emhananyń qurylysyn aıaqtaýǵa baǵyttalady. Qalalyq medıtsınalyq mekemeler qajetti dári-dármektermen jáne jabdyqtarmen, onyń ishinde vaktsınalarmen jáne ımmýnoprofılaktıkalyq preparattarymen qamtamasyz etiletin bolady. Sırek kezdesetin aýrýlary bar 4 myńnan astam patsıent tegin dári-dármektermen qamtylady, – delingen habarlamada.
Sondaı-aq 2025 jyly jedel járdemniń avtoparkin jańartý jalǵasady, ol úshin 50 avtokólik satyp alý kózdelgen.
Sonymen qatar 2024-2025 jyldary 20 densaýlyq saqtaý nysany kúrdeli jóndeýden ótedi, onyń ishinde 10 nysandy 2025 jyly aıaqtaý josparlanyp otyr jáne 30 jańa jáne eski densaýlyq saqtaý nysandaryn jobalaý jumystary jalǵasyp jatyr.
Osyǵan deıin Almatyda tektonıkalyq jaryqshaqtarda ornalasqan 71 úı buzylatyny týraly jazǵan edik.
Budan bólek, megapolıste elektr jelileri jer astymen júrgiziledi.