Keler jyly Aqtóbe óńiri 3 trln teńgeniń ónimin óndiredi — Ashat Shaharov

ASTANA. KAZINFORM — Aqtóbe oblysynyń ákimi Ashat Shaharov keler jyly óńirdiń ekonomıkalyq ósimin keminde 105% deńgeıinde qalyptastyrý josparlanyp otyrǵanyn aıtty.

— 2026 jyly ónerkásip salasynda 3 trln teńge kóleminde ónim óndiretin bolamyz. Sondaı-aq Úkimet qoıǵan josparǵa sáıkes oblysqa 2 trln teńgege jýyq ınvestıtsııa tartý boıynsha jumystar júrgizemiz, — dedi Ashat Shaharov Ortalyq kommýnıkatsııalar qyzmetinde ótken brıfıngte.

Ákimniń aıtýynsha, kelesi jyly normatıvtik jaǵdaıdaǵy avtojoldardyń úlesi 85%-ǵa jetkiziledi. Sondaı-aq halyqty tabıǵı gazben qamtamasyz etý baǵytynda da jumystar jalǵasady.

— Keler jyly 2 myńnan astam turǵyndy qamtıtyn 3 ótpeli jobany aıaqtaımyz. Sonymen qatar 3 jańa jobany iske asyrý josparlanyp otyr, — dedi ol.

Turǵyn úı salasynda barlyq qarjylandyrý kózderinen 1,1 mln sharshy metr turǵyn úı paıdalanýǵa beriledi. Bilim berý nysandaryn salý boıynsha da mańyzdy bastamalar bar.

— Aldaǵy jyly shalǵaı aýyldardy bilim berý uıymdarymen qamtamasyz etý úshin 3 300 oryndyq 12 jańa mekteptiń qurylysy bastalady, — dedi oblys ákimi.

Densaýlyq saqtaý salasynda da birqatar iri joba júzege asady.

— Respýblıkalyq qarajat esebinen oblys ortalyǵynda Oblystyq qan ortalyǵynyń qurylysy bastalady. Sonymen birge 4 aýdandyq aýrýhanaǵa qosymsha ǵımarat salý jáne 8 nysanda kúrdeli jóndeý jumysyn júrgizý kózdelgen, — dedi Shaharov.

Sonymen qatar keler jyly iri sport jáne mádenı nysandardyń qurylysy da jalǵasyn tappaq.

— 35 myń oryndyq fýtbol stadıonynyń, 5 myń oryndyq kópfýnktsıonaldy sport kesheniniń jáne jańa drama teatrdyń qurylysy jalǵasatyn bolady, — dedi óńir basshysy.

Buǵan deıin Aqtóbe oblysynda jergilikti mańyzy bar avtojoldardyń úlesi 82%-ǵa jetkiziletinin jazdyq.

Bıyl Aqtóbe oblysynyń ekonomıkasyna 892 mlrd teńge ınvestıtsııa salynǵany habarlandy.

Eske salsaq, Aqtóbe oblysynda 353 mlrd teńgege jýyq ónim óndirilgen.

Sonymen qatar, bıyl Aqtóbede 745 myń sharshy metr turǵyn úı paıdalanýǵa berildi.