Qazaqstanda munaı óńdeý kólemi 28 mln tonnaǵa jetkiziledi

ASTANA. KAZINFORM – Keler jyldary Qazaqstanda munaı óńdeý kólemi artady. Bul týraly Parlament Májilistegi Úkimet saǵatynda munaı salasyn damytýdy talqylaý kezinde QR Energetıka mınıstri Almasadam Sátqalıev málim etti.

«Bıylǵy 10 aıda munaı óńdeý kólemi 15,1 mln tonnany qurady. 2024 jyly munaı óńdeý 17,9 mln tonnaǵa jetkizilmek. Al 2032 jylǵa arnalǵan josparda 28 mln tonna eskerilgen», - dedi A. Sátqalıev. 

Onyń aıtýynsha, osy jylǵy 10 aıda elimizde munaı ónimderin óndirý 11,1 mln tonnany qurady. Bul rette bıyldyń qorytyndysy boıynsha 14,5 mln tonna óndirilse, 2032 jylǵy josparda 23,7 mln tonna qamtylady.

Mınıstrlik málimetine qaraǵanda, Shymkent munaı óńdeý zaýytynda 2030 jylǵa qaraı óndiris qýatyn eki esege nemese 6 mln tonnadan 12 mln tonnaǵa deıin keńeıtý josparlanǵan. Zaýyttyń munaımen toltyrylýyn qamtamasyz etý úshin «Atyraý – Keńqııaq, Keńqııaq – Qumkól» munaı qubyrlary keńeıtiledi.

Pavlodar munaı óńdeý zaýytynda 2026 jylǵa deıin qosymsha 500 myń qysqy dızel otynyn óndirý jobalaryn júzege asyrý eskerilgen. Birinshi kezeńde bul bastapqy munaı óńdeý qýatyn jylyna 6 mln tonnaǵa deıin arttyrýǵa múmkindik beredi. Jylyna 8 mln tonnaǵa deıin munaı óńdeıtin Pavlodar munaı-hımııa zaýytyn keńeıtýdiń ekinshi kezeńi bastalyp jatyr. Osy jyldyń sońyna deıin aldyn ala tehnıkalyq-ekonomıkalyq negizdemeni ázirleýshini tańdaý josparlanǵan.

Atyraý munaı óńdeý zaýytynda 2028 jylǵa deıin munaıdy qaıta óńdeý qýatyn jylyna 5,5 mln tonnadan 6,7 mln tonnaǵa deıin ulǵaıtý arqyly ashyq tústi munaı ónimderiniń óndirisin 66 paıyzdan 77 paıyzǵa deıin arttyrý sharalary qabyldanbaq.

Bul qadamdar 2035 jylǵa deıin benzınge, avıatsııalyq jáne dızeldik otynǵa degen naryq suranysyn tolyq jabýǵa jáne artyq janar-jaǵarmaıdy eksporttaýǵa múmkindik beredi.

Budan buryn habarlanǵandaı, 2024 jyly shamamen 88,4 mln tonna munaı óndirilse, 68,8 mln tonnasy eksporttalady.

2026 jyldan Qazaqstanda munaı óndirý kólemi 100 mln tonnadan asady.