Keler urpaqqa Nazarbaevtyń rólin zerdeleýge týra keledi – Erlan Sydyqov

NUR-SULTAN. QazAqparat - Keler urpaqqa Nursultan Nazarbaevtyń rólin tereń uǵynyp, zerdeleýge týra keledi. Mundaı pikirdi «Eýrazııalyq ıntegratsııa - N.Nazarbaevtyń tarıhı bastamasy» taqyrybyndaǵy onlaın rejımde ótken telekópir barysynda L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov bildirdi, dep habarlaıdy QazAqparat tilshisi.

«Eýrazııalyq ıntegratsııa ıdeıasy alǵash ret osydan 26 jyl buryn kóterilgeni belgili. Sol ýaqyttan beri ol ózektiligin joıǵan emes. Tipti onyń túpki mánine degen qyzyǵýshylyq artyp kele jatyr desem de bolady. Táýelsiz Qazaqstannyń barlyq jetistikteri memlekettimizdiń Tuńǵysh Prezıdentimen tikeleı baılanysty ekendigi sózsiz», - dedi ýnıversıtet rektory.

Onyń atap ótýinshe, barlyq jahandyq jáne óńirlik daǵdarystarǵa qaramastan Elbasy búginde óziniń tarıhı mıssııasyn sátti oryndap, Qazaqstannyń birligin, turaqtylyǵyn jáne turaqty damýyn qamtamasyz etip otyr.

«Keler urpaqqa Nursultan Nazarbaevtyń Ult kóshbasshysy retindegi rólin zerdelep, uǵyna túsýge týra keledi. Elbasynyń reformatorlyq qyzmetin tarıhı turǵyda baǵalaý qajet», - dedi Erlan Sydyqov.

Sonymen qatar ol búginde barsha álem jahandyq aýqymdaǵy problemalarmen betpe-bet kelip otyrǵandyǵyn basa aıtty.

«Yntymaqtastyqtyń birlesken qadamy ǵana jahandyq apattarǵa qarsy-turýdyń, joǵary damyǵan zııatkerlik qoǵamǵa jetýdiń joly ekendigin ómirdiń ózi dáleldep otyr», - dedi ol.

Eýrazııa ulttyq ýnıversıteti men M.Lomonosov atyndaǵy Máskeý memlekettik ýnıversıtetiniń Qazaqstandaǵy fılıaly birlesip uıymdastyrǵan telekópir barysynda Eýrazııalyq ıntegratsııanyń tujyrymdamalyq máseleleri, odaq memleketteriniń bilimi men ekonomıkalyq ósimi arasyndaǵy ózara baılanys, ǵylym men zamanaýı ınnovatsııalyq tehnologııalardy damytý, eýrazııalyq ekonomıka jáne mádenı yntymaqtastyq vektorlary talqylandy.