Keler aıdan bastap Ózbekstan men Qytaı arasynda 30 kúndik vızasyz rejım ornaıdy

TAShKENT. KAZINFORM – Ózbekstan men Qytaı arasyndaǵy 30 kúndik vızasyz rejım týraly kelisim bıyl 1 maýsymda kúshine enedi, dep habarlaıdy Kazinform agenttiginiń menshikti tilshisi.

Ózbekstan Syrtqy ister mınıstrliginiń málimetinshe, resmı Tashkent pen Beıjiń arasyndaǵy ózara vızalyq talaptardy alyp tastaý týraly úkimetaralyq kelisim aıasynda júrgizilgen ishki rásimder aıaqtaldy.

- Kelisim 2025 jyly 1 maýsymda kúshine enedi. Memleketterdiń aýmaǵynda bolý merzimi 30 kúnnen aspaýy tıis. Eger 30 kúnnen assa, onda azamattar aldyn ala vıza resimdeýi qajet, - delingen vedomstvo taratqan habarlamada.

Mınıstrlikten atap ótkendeı, atalǵan kelisim Qytaıdyń Gongkong pen Makao sııaqty arnaıy ákimshilik aýdandarynyń aýmaǵyna barý úshin qoldanylmaıdy.

Eske salaıyq, byltyr qarashada Ózbekstan men Qytaı vızasyz rejım ornatýǵa múddeli ekenin habarlap edik. Kóp uzamaı, ıaǵnı 1 jeltoqsanda Ózbekstan men Qytaıdyń Syrtqy ister mınıstrleri azamattarǵa 30 kún ishinde vızasyz qos elge barýǵa múmkindik beretin kelisimge qol qoıdy.

Bıyl qańtarda BAQ ókilderine suhbat bergen Uzbekistan Airways kompanııasy tóraǵasynyń orynbasary Shýhrat ıAdgarov Ózbekstan men Qytaı arasynda vızasyz rejım engizýge baǵyttalǵan kelisim bıyl naýryzdan keıin kúshine enýi múmkin ekenin málim etti.