Keler aıda Ózbekstanda AES qurylysy boıynsha qoǵamdyq tyńdaý ótedi

TAShKENT. KAZINFORM — 23 jeltoqsanda Ózbekstanda AES salý usynysy boıynsha qoǵamdyq tyńdaý ótedi. Bul týraly «Uzatom» agenttiginiń baspasóz qyzmetinen málim etti, dep habarlaıdy Kazinform agenttiginiń menshikti tilshisi. 

— 2025 jyly 23 jeltoqsanda saǵat 11:00–de Jızaq oblysyna qarasty Farısh aýdanyndaǵy Bogdon eldi mekeniniń № 30 mádenı ortalyǵynda Ózbekstanda atom elektr stantsııasyn salý jobasy boıynsha qoǵamdyq tyńdaýlar ótedi. Qoǵam ókilderin jáne barlyq qyzyǵýshylyq tanytqan taraptardy atalǵan is-sharaǵa belsendi qatysýǵa shaqyramyz, — dep málim etti agenttikten.

Vedomstvonyń aqparatyna saı, AES-tiń jalpy qýaty — 2110MVt. Ol jylyna 16-17 mlrd kVt/saǵ elektr energııasyn óndiredi. Strategııalyq nysannyń qurylysy barysynda — 13 myń, al ol tolyq iske qosylǵanda 2 myń adam jumyspen qamtylmaq.

Eske salaıyq, Ózbekstanda salynyp jatqan AES Jızaq, Samarqand jáne Naýaı oblystaryn elektr energııasymen qamtamasyz etýge qaýqarly bolady.

Sondaı-aq, taıaýda Ózbekstanda atom elektr stantsııasy qurylysynyń birinshi kezeńi bastalǵanyn jazyp edik.

Buǵan deıin habarlaǵanymyzdaı, Reseı Ózbekstanda taǵy bir AES salady.

Qosa ketsek, jaqynda QR Atom energetıkasy jónindegi agenttik tóraǵasy Almasadam Sátqalıev elimizdegi tuńǵysh AES-tiń alǵashqy betony shamamen 2029 jyly quıylýy múmkin ekenin aıtty.