Kelbet Nurǵazına: jeńil atletıka sportyn mektepten bastap qolǵa alý kerek
ASTANA. KAZINFORM — Jeńil atletıka federatsııasynyń bas hatshysy Kelbet Nurǵazına Tokıoda ótken álem chempıonatyn qorytyndylady.
Bas hatshy Instagram-daǵy paraqshasynda álem birinshiliginen qandaı oı túıgenin aıtty.
— Búgin Tokıoda jeńil atletıkadan álem chempıonaty aıaqtaldy. Qazaqstan jeńil atletıka federatsııasyna jaqynda taǵaıyndalǵan Bas hatshysy retinde bul birinshilik biraz nárseni baǵamdaýǵa múmkindik bergenin aıtqym keledi. Álemdik jeńil atletıkanyń deńgeıine qarap, ári qaraı ne isteý kerektigin jáne qalaı jyljý qajettigin naqty aıqyndaıtyn sát keldi. Qazaqstandyq sportshylar jeńil atletıkanyń tehnıkalyq túrlerinde nátıje kórsetýge qabiletti, biraq basqa baǵdarlamalardy da nazardan tys qaldyrmaǵan jón, — dedi ol.
Onyń aıtýynsha, qazaqstandyq sportshylar álem chempıonatynda óz áleýeti jetkenshe tyrysyp baqty. Sondaı-aq, atletter qazirgi tańdaǵy daıyndyq deńgeıiniń qandaı ekenin kórsetti.
Kelbet Nurǵazına elimizdegi jeńil atletıka sportynyń damý jaǵdaıyna toqtaldy.
— Jeńil atletıka — eń kóp medal taratatyn ári buqaralyq sport túri sanalady, dese de, bizdiń máseleniń tamyry tereńde jatyr. Eń aldymen, aımaqtardaǵy jeńil atletıkanyń damýyna mán berý qajet. Sebebi, rezervti biz jan-jaqtan alamyz. Osy oraıda, elimizdiń batysynda — Atyraý, BQO, Mańǵystaý jáne Aqtóbe óńirlerindegi jaǵdaıdyń qıyn ekenin atap ótý kerek. Birdi-ekili sportshylardy esepke almasaq, atalǵan aımaqtarda jeńil atletıka múldem joq deýge bolady, — deıdi bas hatshy.
Jeńil atletıka federatsııasynyń basshysy kadr tapshylyǵy ózekti másele ekenin tilge tıek etti. Onyń aıtýynsha, kezinde Olımpıada chempıondaryn daıyndaǵan bilikti ári saýatty bapkerlerdiń basym bóligi qazir zeınet demalysynda. Ókinishke qaraı, biligi mol jattyqtyrýshylardyń izin basatyn mamandar joq, júıeli túrde maman daıyndaý máselesi sol kúıi sheshilmegen.
— Sol sebepti, el aımaqtaryndaǵy jas ári talantty mamandardy qoldaý, olardyń jarystarǵa, oqý-jattyǵý jıyndaryna qatysýyna múmkindik jasaý, bilikti mamandarmen tájirıbe almasyp, zamanaýı ádisterdi úırenýine jol ashý — bizdiń basty mindetimiz. Muny rettemeıinshe, biz rezerv tapshylyǵyn joıa almaımyz, iri jeńisterge qol jetkize almaımyz, — dedi ol.
Kelbet Nurǵazına jeńil atletıka sportyn mektepten bastap qolǵa alý kerek ekenin aıtty.
— Qosanov týrnırine arnalǵan baspasóz máslıhatynda men elimizdiń batys aımaqtaryndaǵy jeńil atletıkany damytý máselesin kóterdim. Búginde Aqtóbe oblystyq sport basqarmasy osy baǵytta jumys isteýge daıyn ekenin kórsetti. Osy oraıda, jeńil atletıkany damytýǵa ózge óńirlerdiń de múddeli bolǵany asa mańyzdy. Sebebi, bul sporttyń bastaýy balalyq shaqta — mekteptegi dene shynyqtyrý sabaqtarynda jatyr, — deıdi bas hatshy.
Osyǵan deıin habarlaǵanymyzdaı, jeńil atletıkadan Qazaqstan quramasynyń ókili Nora Djerýto Japonııanyń Tokıo qalasynda ótip jatqan álem chempıonatynyń fınalynda baq synap, altynshy orynnan kórindi.