Kelbeti nasharlaǵan: Almatyda olımpıadalyq dańq mýzeıi nelikten jabyq tur
ALMATY. KAZINFORM — 2016 jyldan beri Respýblıkalyq sporttyq jáne olımpıadalyq dańq murajaıynda jóndeý jumystary júrgizilmegen.
Áleýmettik jelide almatylyqtar Seıfýllın jáne Bógenbaı batyr kósheleriniń qıylysynda ornalasqan Respýblıkalyq sporttyq jáne olımpıadalyq dańq mýzeıiniń jabyq turǵanyna shaǵymdandy.
Osy oraıda Kazinform agenttigi mýzeı qaramaǵyna kiretin Qazaq sport jáne týrızm akademııasyna habarlasyp, mán-jaıdy anyqtady.
Akademııa málimetinshe, murajaı kelýshiler leginiń tómendeýine baılanysty JOO, sport mektepteri, jalpy bilim beretin mektepter sekildi mekemelerden aldyn ala túsken suranystarǵa sáıkes, tek arnaıy keste boıynsha jumys isteıdi: dúısenbi 12:00–18:00, sársenbi 13:00–18:00, beısenbi 11:00–15:00 jána juma 13:00–18:00.
Sonymen qatar Qazaq sport jáne týrızm akademııasy tarıhı ǵımarattyń nashar syrtqy kelbetine baılanysty jaýap berdi.
— Murajaı ǵımaraty arhıtektýralyq eskertkishter sanatyna jatatyndyqtan, biz «Qazqaıtajańǵyrtý» RMK talaptaryna sáıkes jáne osy mekemeniń arnaıy ruqsatynsyz ǵımarattyń syrtqy kelbetine kúrdeli jóndeý jumystaryn júrgize almaımyz. Biraq bizdiń mekemeniń sharýashylyq jumystarynyń josparyna sáıkes, osy jyldyń jaz mezgilinde jeńil jóndeý jumystaryn júrgizý josparlanǵan, — dep túsindirdi akademııadan.
Aıta ketken jón, murajaı ǵımaraty 1888 jyly salynǵan. 1988 jyly ǵımaratqa qaıta qalpyna keltirý boıynsha kúrdeli jóndeý jumystary júrgizilgen.
1999 jyly murajaı Qazaq sport jáne týrızm akademııasynyń qaramaǵyna ótken.
Ǵımarattyń syrtqy kelbetine jáne ishindegi bólmelerine kúrdeli jóndeý jumystary sońǵy ret 2016 jyly jasalǵan.
Qazaq sport jáne týrızm akademııasynyń málimetine sáıkes, murajaıda jalpy sany 700 astam jádiger saqtalǵan.
Olardyń qatarynda: kýbok, medal, gramotalar, dıplomdar, sývenırler, fotosýretter, áıgili sportshylardyń jeke zattary men qujattary, jartasqa salynǵan ejelgi sýretterdiń kóshirmeleri, búrkitshilerdiń arnaıy atrıbýtıkalary bar.
Eske salaıyq, buǵan deıin Almatynyń Neke saraıy nelikten qaraýsyz qalǵanyn jazǵanbyz.